Roma 9

Ty Fiferenaiña’i Paoly

1Mitaroñe ty hatò amy Norizañey iraho fa tsy misovo-bolañe; mitrao-pitaroñe am-pitsakoreako i Arofo Masiñey, 2t’ie lonjetse, naho mitolom-pihontoke ty an-troko atoa, 3fa nisalalaeko t’ie haitoañe amy Norizañey ty amo longoko ama’ nofotseo, 4ie nte-Israele, a’ iareo ty fameloman-ko anake, ty engeñe, o fañinao, ty fanolorañe Hàke, i fisoroñañey, vaho o fampitamàñeo; 5a’ iareo o raeo, naho boak’am’iareo ami’ty nofotse i Norizañey—i ambone’ ze he’ey, i Andrianañahare rengeñe nainai’ey. Amena.

6Fa tsy te nilesa o tsaran’ Añahareo, amy te tsy hene nte-Israele t’ie tarira’ Israele, 7mbore tsy songa anake t’ie tiri’ i Abraàme; fa,

Am’ Isaka ty ikanjiañe o tiri’oo,1

8aa le tsy o tariratse ama ­nofotseo ro anan’ Añahare, fa o ana’ i fitamàñeio ro volilieñe ho tariratse. 9Hoe ty tsara’ i fitamàñey,

Hibalike ami’ty sa toy raho

le hanañ’ ajajalahy t’i Sarahae.2

10Mbore adodea amy Ribkae, ie nampiareña’ Isaka raentika indrai-piolotse, 11(iereo mbe tsy nitoly, mboe tsy nanao inoñe ndra soa ndra raty, soa te hijadoñe i fijoboñañe sinafirin’ Añaharey, tsy amo tolon-drahao fa amy Mpikanjiy), 12le hoe ty tsinara ama’e:

Hitoroñe ty zai’e ty zoke’e,3

13amy pinatetse ty hoe:

Nikokoako t’Iakobe

fa nihejeko t’i Esave.4

14Inoñ’arè ty hatao-­tika? Hera aman’ Añahare ao ty tsy to. Sondo’e izay! 15Fa hoe re amy Mosè:

Ho ferenaiñeko ze hiferenaiñako,

le ho tretrezeko ze hitretrezako.5

16Aa le tsy ty fisalalà’ ondaty, tsy ty filaisa’ ondaty, fa i Andria­nañahare mpitretrè. 17Le hoe i Sokitse Masiñey amy Farao:

Amo safiry zao ty nampionjonako azo,

te ihe ty hampiboahañe ty haozarako,

naho hanitsihañe ty tane toy ami’ty fitaroñañe i añarakoy.6

18Aa le tretreze’e ze satri’e, naho ampigàñe’e ze laha’e.7

19Aa ke hatao’ areo amako ty hoe, Inoñe arè ty itiñea’e an-tika? Ia ty hahasebañe i satri’ey? 20Hete, ry ‘ndaty, ia v’iheo te manoiñe aman’ Añahare? Ho volañe’ i namboareñey ty hoe hao i namboatse azey: Akore ty nanoe’o ahy?’8 21Hera añana’ i mpanao valañe-taney lily i lietsey, t’ie ami’ty boko’e raike ro itsenea’e sinim-pia­siañe naho ty valàñe tsotra? 22Aa vaho akore t’i Andrianañahare, ie te hamente ty haviñera’e naho hampandrendreke ty haozara’e, ro nifeake haliñisañe amo valàñen-kabosehañe haro­tsakeo, 23hampahafohinañe ty hafanjàka’ ty enge’e amo valañem-pitretrezañeo, o nihentseñe’e taolo ho rengèñeo? 24Itika nikanjie’e ‘nio, tsy amo Jiosio avao, fa amo kilakila ondatio ka? 25ie natovo’e amy Hosea ao, ty hoe:

Ho tokaveko ty hoe: Ondatiko

o tsy ni-ondatikoo,

vaho Kokoa’e, i tsy nikokoañey.9

26Hifetsake an-toetse nanoañe am’ iereo ty hoe: Tsy ondatiko nahareo,

t’ie hikanjiañe ty hoe: anak’ Andrianañahare veloñe10.

27Le hoe ty koi’ Isaia ty am’Israele:

Ndra te nira amo fasen-driakeo

ty ia’ o tiri’ Israeleo,

ty sehanga’e avao ty ho rombaheñe,11

28fa hafetsa’ Iehovà

an-tane atoy i tsinara’ey;

tsy kalafo naho masika.12

29Le ty amy nitokia’ Isaiay:

Naho tsy napo’ i Talè-i-Màroy tiry tika

le ho nanahake i Sodoma

vaho ho nihambañe amy Gomora.13

30Inoñe arè ty ho asan-tika? T’ie nitendreke havantañañe o kilakila ondaty tsy nimane havañonañeo, eka, toe havantañañe mijadoñ’ am-patokisañe; 31fa tsy nahatakatse ty havantaña’ i Hake ka t’Israele nimanemane Hàke. 32Akore? Amy t’ie tsy am-patokisañe fa am-pimanemaneañe, toe nitsikapia’ i vato fitsikapiañey14. 33Hoe ty pinatetse:

Hehe, Apoko e Ziona ao ty vato fitsikapiañe

naho ty vato faminganañe;

fa tsy ho salatse ty miato ama’e15.