Bentatse 4

Fitalahoañe Andindìñe ao

(Isa 6.1-3)

1Ie añe, le nañente, vaho naheoko ty lalañe nisokake andindìñe ey, vaho nanao ty hoe amako i fiarañanañañe hoe antsiva1 tsinanoko am-baloha’e nitsara amakoy: Mañambonea mb’etoa, hitoroako ze tsy mahay tsy ho avy henane zao.

2Nitojo amako t’ie añ’arofo, naho inge te nijadoñe an-dikerañe ey ty fiam­besatse, vaho eo t’i ni­am­besatse amy fiambesatsey. 3Hoe vato jaspy2 naho karneola5 i niambe­sa­tsey naho niarikatoke i fiam­besatsey ty àvañe hoe emarode6 te isaheñe. 4Niariseho i fiambesa­tsey ty fiambesam-pifeheañe roapolo efats’amby naho amy fiambesatse rey ty androanavy roapolo efats’ amby misaroñe lamba foty, le añambone’ iareo eo songa an-tsabaka volamena. 5Niboak’ amy fiambesatsey ty helatse nitsipelatse naho fikorokodoiñañe naho fiparapapiahan-kotroke; vaho nirebareba añatrefa’ i fiambesatsey eo ty jiro fito, i tio-fiton’Añaharey. 6Añatrefa’ i fiambesatsey eo ty riake fitaratse, hoe kristaly, naho añivo eo vaho mañohoke i fiambesatsey ty raha veloñe efatse atse-pihaino aolo’e naho amboho’e.

7Manahake ty liona i raha veloñe valoha’ey3, le manahake ty bania ty raha veloñe faha-roe le hoe amam-binta’ ondaty i raha veloñe faha-teloy vaho hoe vantio miti­liñe i raha veloñe fah’efatsey4. 8Songa aman’ elatse eneñe5 i raha veloñe efatse rey, atse-pihaino añ’ariseho aze naho añate’e ao, ie tsy mitroatse handro an-kaleñe manao ty hoe:

Masiñe, masiñe, masiñe

t’i Talè Andrianañahare Tsitongerèñey6,

i teo, naho eo, vaho ho aviy.

9Ndra mbia’ mbia te mandrenge naho miasy vaho mañandriañe i miambesatse amy fiambesatseiy—i veloñe nainai’e doniay—i raha veloñe rey, 10le mibabok’ añatrefa’ i miambesatse amy fiambesatseiy i androanavy roapolo efats’ amby rey mitalaho amy veloñe nainai’e doniay, vaho mañifike o sabakam-bolonahe’ iareoo añatrefa’ i fiambesam-bolonahetsey, manao ty hoe:

11Mañeva irehe, ry Talè,

ty handrambe engeñe,

naho hasiñe, naho haozarañe7,

amy te Ihe ro namboatse ze halifora’e,

naho an-tsatri’o ty maha-eo iareo vaho t’ie namboareñe.