Sabo 89

Fanoroa’ i Etane nte-Ezrà

1Ho saboeko nainai’e

ty fiferenaiña’ Iehovà,

hampahafohineko am-bava

ze hene tariratse mifandimbe

ty figahiña’o.

2Fa hoe iraho: mioreñe nainai’e

ty fiferenaiñañe,

najado’o andindiñe ao ty figahiña’o.

3Nanoeko fañina amy jinobokoy,

nifanta amy Davide mpitorokoy:

4Hajadoko pak’añ’afeafe’e o tarira’oo,

naho hatroako amo hene tariratseo

ty fiambesam-panjakà’o. Selà

5Ho rengè’ o likerañeo o halatsà’oo

ry Iehovà, naho ty figahiña’o

am-pivori’ o noro’oo.

6Fa ia an-dikerañe ao ty

mañirinkiriñe am’ Iehovà?

Ia amo ana’ o manjofakeo ty

hambakambañe am’ Iehovà?

7I Andrianañahare

añeveña’ ty fivori’ o noro’eo;

hene ilatsa’ o miariseho’ azeo.

8Ry Iehovà Andrianañahare’ i Màroy,

ia ty mañirinkiriñe azo?

Ry Ià maozatseo, ohoñe’ty figahiña’o.

9Fehe’o ty fitroña’ o riakeo,

ie mitroatse o alo’eo le ampipendreñe’o.

10Dinemodemo’o ty Rahabe

manahake o vinonoo;

binaibaim-pitàn-kaozara’o o rafelahi’oo.

11Azo o likerañeo, Azo ka ty tane toy;

ty voatse toy naho ty halifora’e.

Ihe ro nañoreñe iareo.

12Ty avaratse naho ty atimo,

songa nitsenè’o;

rebehe’ i Tabore naho i Kermone

ty tahina’o.

13Maozatse ty sira’o, fatratse ty fità’o,

mionjoñe ty fitàn-kavana’o.

14Ty havañonañe naho ty hatò

ro fioreñam-piambesa’o;

iatrefa’ ty fiferenaiñañe

naho ty havantañañe.

15Haha t’ondaty mahafohiñe

i fipoñafam-peoy,

Hañavelo ami’ty fireandrean-

dahara’o iereo, ry Iehovà;

16I tahina’oy ty hitreña’ iareo

lomoñandro,

ie onjoñe’ ty havantaña’o.

17Ihe ro enge’ ty haozara’iareo,

mañonjoñe ty tsifa’ay ty fañosiha’o.

18A i Iehovà ty fikalan-defo’ay,

a i Masi’ Israeley ty Mpanjaka’ay

19Teo ty nitsarae’o añ’aroñaroñe

amo noro’oo, ty hoe:

fa nìmbaeko i fanalolahiy;

fa nonjoneko ty jinoboñe am’ ondatio,

20nitreako t’i Davide mpitoroko;

i norizako amy soliko miavakeiy.

21Ho gañe ama’e ty tañako,

hampaozatse aze ka ty sirako

22Tsy hamañahy aze o rafelahio,

tsy hampilovilovy aze i anan-karatiañey.

23Ho demoheko añatrefa’e

o rafelahi’eo,

vaho ho zevoñeko o malaiñ’azeo.

24Ho ama’e ty figahiñako naho

ty fiferenaiñako,

ty añarako ro fañonjonañe ty tsifa’e.

25Hasampeko amy riakey ka ty fità’e,

naho ty fitàn-kavana’e amo sakao.

26Ho kanjie’e ami’ty hoe: Ihe ro Raeko,

Andrianañahareko, vaho

ty lamilamim-pandrombahañe ahiko.

27Hanoeko tañoloñoloñako re

ho talèm-panjaka’ ty tane toy.

28Hambenako ami’ty fiferenaiñako nainai’e, le hijadoñe ama’e ty fañinako.

29Haoreko tsy ho modo nainai’e

o tarira’eo,

ho mira amo

andron-dikerañeo ty fiambesa’e.

30Aa naho zehare’ o ana’eo i Entakoy

naho tsy mañavelo amo fepèkoo,

31naho lilare’ iareo o fañèkoo, vaho tsy mitañ’ o fandiliakoo,

32Le ho tiliheko an-kobaiñe ty fiolà’ iareo,

naho am-pòfoke o tahi’ iereoo.

33Fe tsy hasintako ama’e

ty fiferenaiñako,

vaho tsy hivalik’ ami’ty figahiñako.

34Tsy ho tivaeko i fañinakoy,

ndra hañova ze naakan-tsoñiko.

35Teo ty nifantàko ami’ty hamasiñako,

—zaho tsy handañitse amy Davide—

36Tsy ho modo nainai’e i tiri’ey,

vaho manahake i masoandro aolokoy i fiambesa’ey;

37hioreñe nainai’e re manahake i volañey,

vaho higahiñe manahake

i valolombelon-dikerañey. Selà

38Fe sinoi’o añe iraho, nifarieñe,

niviñera’o i noriza’oy.

39Novohe’o ty fañina’o amy mpitoro’oy; nitivae’o an-debok’ao ty sabakan-enge’e.

40Fonga tinorotosi’o o kijoli’eo

narotsa’o iaby o rova’eo.

41Ikopaha’ ze hene miary eo;

Andrabioña’ o mifankarine ama’eo.

42Naonjo’o ty tañan-kavana’

o malaiñe azeo;

nampirebehe’o o rafelahi’e iabio;

43Mbore nafote’o i lelam-pibara’ey

le tsy ampijohañe’o an-kotakotak’ ao.

44Najihe’o ty enge’e, naho

navokovoko’o an-tane eo i fiambesa’ey.

45Nitomore’o o andron-katora’eo, kinolopo’o hasalaran-dre. Selà

46Pak’ombia ry Iehovà?

Hietake nainai’e v’iheo?

Sikala ombia ty hiforoforoa’

ty fifombo’o hoe afo?

47Tiahio ty habori’ o androkoo,

akore ty hakoahañe nitsenè’o

ze kila ana’ ondaty !

48Ia t’indaty veloñe tsy ho liàn-kavilasy,

ho haha’e ami’ty haozara’

i kiboriy hao ty fiai’e? Selà

49Aia o fiferenaiña’o haehaeo, ry Talè,

ze nifantà’o amy Davide ami’ty figahiña’o?

50Tiahio ry Talè, ty fañivañivañe

i mpitoro’oy,

ie otroñeko añ’arañako ondaty maroo,

51ie kinizakiza’ o rafelahi’oo, ry Iehovà,

ie ninjè’ iareo o lia’ i noriza’oio;

52Andriañeñe nainai’e t’Iehovà.

Ie izay, naho Amena.