Sabo 74

Fanoroa’ i Asafe

1Ry Andrianañahare,

ino ty ifaria’o anay zafe-anake?

Ino ty ifomboa’o o añondry fiandraze’oo?

2Tiahio i valobohòke vinili’o haehaey,

i foko jineba’o ho lova’oy !

naho ty vohi’ i Tsiône fimoneña’oy.

3Aonjono o fandia’oo

mb’amy hakoahañe nainai’ey,

jinoi’ i rafelahiy ze hene raha

an-toe’ i miavakey ao1.

4Niroharoha añivo’ o famantaña’oo

o rafelahi’oo;

najado’ iareo ty vilo’ iareo ho viloñe.

5Sata’e ty maonjom-pekoñe

añ’ala matahetse ao;

6Ie henaneo, mamatsike

am-pekoñe naho rabosàke

o varamba’e nitsenèñe an-tsokitseo.

7Finorototo’ iereo pak’an-tane

i efe’o miavakey;

nitivae’ iereo i fimoneñan-

tahina’o masiñey.

8Hoe ty fisafirin-tro’iareo:

Antao haharo ambaneñe iaby iereo;

Fonga nitomontoe’ iareo

o toem-pivorin’ Añahare an-taneo.

9Tsy mahatrea o vilo’aio zahay;

tsy amam-pitoky ka; naho

tsy ama’ay ty mahafohiñe te hombia.

10Pak’ombia ry Andrianañahare,

te mbe hanìtse avao i rafelahiy?

Ho tsambolitio’ o malaiñ’azo nainai’e hao i tahina’oy2?

11Ino ty nanitaha’o ty fità’o?

I fitàn-kavana’oy?

Afaho boak’ añ’araña’o ao ty fità’o,

vaho mongoro?

12Toe mpanjakako boake haehae

t’i Andrianañahare,

mitoloñe fandrombahañe an-tane atoy.

13Riniaria’o an-kaozarañe i riakey

vaho dinemo’o an-drano ao

o loha’ i fañaneñeio.

14Hinoto’o o loha’ i fañanen-driakeio,

hamahana’o o mpimoneñe

am-patrañeo.

15Nipoñafe’o o rano mitsiritsiokeo

naho o sakao;

nimaihe’o o oñe mikararake nainai’eo.

16Azo ty antoandro, Azo ka ty haleñe;

fa nihajarie’o o hazavàñeo naho i àndroy

17Najado’o iaby o fiefe­tsefe’ ty tane toio,

nanoe’o ty asotry naho ty asara.

18Tiahio, ry Iehovà,

te niteratera i rafelahiy,

vaho nitivae’ o lo-tsere­keo i Tahina’oy.

19Ko atolo’o ami’ty biby hàko ty deho’o,

ko haliño’o nainai’e o nanilofe’oo.

20Ambeno i fañinay,

fa atseke kibohon-kasiahañe

o toetse maieñe’ an-taneo !

21Ko hampolie’o an-kasalarañe

o demokeo!

fa hibango i tahina’oy

o misotrio naho o poie’eo.

22Miongaha, ry Andrianañahare,

ihalalio o azoo;

tiahio ty fiterà’ i dagolay

lomoñandro.

23Ko haliño ty feo’ o rafelahi’oo;

mitoabotse nainai’e ty fifandragaragà’

o mitroatse ama’oo.