Sabo 7

Nisaboa’ i Davide aman’Añahare ty amy saontsi’ i Kosy nte-Beniamine

1Ry Iehovà Andrianañahareko,

Ihe ro fitsolohako, avotsoro

amo mañoridañe ahikoo, le hahao;

2Tsy mone ho ritaritae’e

hoe liona ty fiaiko,

hirofodrofota’e tsy

amam-pañolotse.

3Ry Iehovà Andrianañahareko,

naho nanoeko zao :

lehe an-tañako ty hatsivokarañe,

4naho vinaleko haratiañe ty rañeko;

hera nivoloseko tsy amam-poto’e

ty nañembets’ ahy;

5Le ho hotrohe’ ty rafelahiko, hiambotraha’e;

ho lialià’e an-tane ty haveloko, vaho hado’e an-debok’ ao

ty engeko. Selà

6Miongaha, ry Iehovà, an-kaviñera’o,

miavota ty amo fitrotrofiaha’

o rafelahikoo.

mivañona ty amako amy zaka kinoi’oy.

7Hiarikatok’ ama’o ty fivori’ ondatio,

vaho mibaliha hifehea’o

boak’añ’abo ey.

8Ry Iehovà Mpizaka o kilakila ‘ndatio;

zakao iraho ry Iehovà, ty amy havantañako naho ty havañonako an-trok’ ao.

9Hijihetse ty haratia’ o lo-tserekeo

naho hajado’o o vañoñeo,

fa mpitsòke arofo naho ova

t’i Andrianañahare vantañe.

10Aman’Añahare ao ty fikalako

Ie mpandrombake o vañon-trokeo.

11Mpizaka to t’i Andrianañahare,

Eka, torifike boak’ andro

t’i Andrianañahare;

12Aa naho tsy mimpoly t’indaty: le ho sioña’e i fibara’ey;

fa navoho’e ty fale’e

vaho nihajarie’e;

13Fa nihentseñe’e fialiañe mahafate,

ampibelabelae’ afo o ana-pàle’eo.

14Hehe t’ie tsongoen-tsihavokarañe,

ie nampiareñe kilily

vaho hiterake i remborake;

15Nihaly kobon-dre naho nampigorabahe’e,

vaho tafajorobo amy hinali’ey.

16Toe hibalik’ an-doha’e avao

ty fikitroha’e raty,

vaho hivotrak’ an-kevo’e eo

i nandovia’ey.

17Andriañeko t’Iehovà

ty amy havantaña’ey,

ho bangoeko an-tsabo ty tahina’

Iehovà Andindimoneñe.