Sabo 69

Ho a i Talè, Sabo’ i Davide ami’ty feo : O Talìfokeo.

1Rombaho iraho ry Andrianañahare

fa nizilike añ’ovako ao ty rano.

2Milempotse an-­ditsake lalek’ ao iraho,

tsy ao ty ho liàñe;

fa nijolofoñe an-drano lalek’ ao

naho mandipotse ahy o alon-driakeo.

3Mahamokotse ahy ty fitañiako,

maike ty am-peoko ao;

milesa o masokoo amy fisalalako

an’Andrianañaharekoy.

4Mandikoatse o volon-dohakoo

ty malaiñe ahy tsy am-bente’e;

maro ty te handrotsak’ ahiko,

ie rafelahiko tsy an-dengo’e;

havahako hao ty tsy nikamereko?

5O Andrianañahare, arofoana’o

ty hadagolako,

vaho tsy mietak’ ama’o o tahikoo.

6Tsy izaho abey ty hisalara’

o misalala Azoo,

ry Iehovà, Talè’ i Màroy;

ee te tsy izaho ty himeñara’

o mipay Azoo,

ry Andrianañahare’ Israeleo.

7Amy te Ihe ro nahatantezako rabioñe;

manaroñe ty tareheko ty hasalarañe.

8Fa ambahiny aman-drolongoko

iraho naho alik’ amo anan-drenekoo.

9Amy te namotsek’ ahiko

ty fahimbañako amy anjomba’oy;

le nidoñe amako ty inje’

o mañinje Azoo.

10Izaho nitañy añ’ovako ao

naho nililitse, ninjare tiñe amako.

11Ie nanoeko lamba-gony ty sikiko, le nirabioñeñe.

12Mivolambolañe ahy o miambesatse an-dalambeio;

vaho ibekoa’ o jikeo.

13Fa naho izaho, Ihe ty ihalaliako,

ry Iehovà, ami’ty andro mete,

ry Andrianañahare ami’ty habeim-piferenaiña’o, toiño raho

ami’ty hatòm-pandrombaha’o.

14Ihahao amo litsakeo,

le ko apo’o hijoroboñe,

avotsoro amo malaiñe ahio,

vaho amo rano lalekeo.

15Ee t’ie tsy hopoe’ o fisorotombahañeo,

ndra hagodra’ i tsikeokeokey;

ndra hitsiteha’ ty vava’ i koboñey.

16Toiño iraho ry Iehovà,

ami’ty hasoan-kafatraram-pikokoa’o;

mitoliha amako ami’ty

harà’elahim-piferenaiña’o.

17Ko aetak’ ami’ty mpitoro’o

ty lahara’o, fa ampoheke,

masikà te manoiñe.

18Harineo ty fiaiko, vaho jebaño;

vilio amo rafelahikoo.

19Arofoana’o ty tìñeko, ty hameñarako, naho ty hasalarako;

añatrefa’o eo ze hene rafelahiko.

20Fa nahakoretse ty troko o rabioñeo,

lifon-kasiloke iraho;

nipay tretre, fa tsy nitendreke;

naho mpañohò, fa tsy nahatrea.

21Hete! finaha’ iareo voreke raho

vaho finantso’ iareo vinegra

amy haran-dranoakoy.

22Ho fàndrike ty fandam­bañañe añ’atrefa’ iareo;

ie mierañerañe te mikoropoke.

23Haieñe o fihaino’ iareoo,

tsy hahaisake,

vaho ampiozoñozoño nainai’e o toha’eo.

24Adobaño am’ iereo ty haviñera’o,

le ampitsepaho ami’ty fifombo’o

miforoforo.

25Hangoakoake ty tobe’ iareo;

tsy himoneña’ ondaty o kiboho’eo.

26Amy te sarerahe’e i linafa’oy,

vaho nindrae’ iereo ty fanaintaiña’

o vinonotrobo’oo.

27Tompeo tahiñe ty hakeo’ iareo,

le ko apo’o hifoak’ an-kavantaña’o ao.

28Faoho amy boken-kaveloñey iereo,

tsy hitrao-pisokitse amo vañoñeo.

29Misotry naho marare iraho;

ampañonjono ahy añ’abo ey

ty fandrombaha’o, ry Andrianañahare.

30Ho bangoeko an-tsabo

ty tahinan’ Andrianañahare,

naho honjoneko am-pañandriañañe.

31Ie ho no’ Iehovà mandikoatse ty vosy valo-ay reke-tsifa naho hotro.

32Ho oni’ o mpirèkeo le ho ehake;

ry mpipay an’ Andrianañahare,

misotrafa añ’arofo.

33Fa mahajanjiñe o rarakeo t’Iehovà,

vaho tsy sirikae’e o an-drohio.

34Misaboa Aze ry likerañeo naho

ty tane toy,

ry riakeo naho ze hene misorok’ ao.

35Fa ho rombahen’Añahare ty Tsiône,

naho hamboare’e o rova’ Iehodào

vaho himoneñe ao iereo ho hanañañe.

36Ho lovae’ ty tiri’ o mpitoro’eo,

himoneña’ o mikoko i tahina’eio1.