Sabo 51

Ho a i Talè: Sabo’ i Davide, ami’ty fitiliha’ i Natana mpitoky, ie fa niolots’ amy Bat’sebae.

1Ry Andrianañahare,

matariha amy hafatraram-pikokoa’o, faopaoho o fiolàkoo amo hara’elahim-piferenaiña’oo,

2Kotriño hitoratsike amo tahikoo,

liovo amo fandilarakoo.

3Apotako o fiolàkoo:

vaho miatrek’ ahy nainai’e o hakeokoo.

4Ama’o, le ama’o avao ty nandilarako;

naho nanao hatsivokarañe

am-pivazohoa’o;

soa te ho rendreke to t’ie mitsara,

vaho vantañe te mizaka.

5Toe naterak’ an-kakeo iraho,

naho an-tahiñe t’ie niareñen-drene.

6Inao, mipay hatò añ’ova ao irehe,

aa le ampandrendreho hìhitse

mietake iraho.

7Efero an-tseva1 iraho, hikotritriake;

ampandrò ho foty matsatsaoke

te amo volovasoo2.

8Ampitsanoño firebehañe

naho hafalean-draho;

soa te hiankahake o taolañe dinemo’oo.

9Aetaho amo tahikoo ty lahara’o,

ehe fonga forò o hakeokoo.

10Itseneo fo vao ry Andrianañahare;

le vaò añ’ovako ao ty troke migahiñe.

11Ko ahifike tsy ho añatrefa’o eo iraho,

le ko apitsok’ amako i Arofo’o Masiñey.

12Ampolio amako ty hafalea’

i fandrombaha’oy,

itohano ho aman-troke mahimbañe.

13Le hampahafohineko

o aman-kakeoo o lala’oo,

hampipoliañe o mpanan-tahiñeo.

14Hahao ami’ty lio-màlin-draho,

ry Andrianañahare, Andrianañaharem-

pandrombahañ’ ahikoy;

le ho saboen-delako o havantaña’oo.

15O Talè, sokafo o soñikoo

hitaroñam-bavako ty fandrengeañ’ Azo

16Toe tsy mahafale Azo o soroñeo,

fa ho nibanabanaeko;

tsy no’o o soroñe oroañeo.

17Ty soron’ Añahare, le troke mihoto;

tsy ho sirikae’o ry Andrianañahare,

ty arofo rofotse naho mikoretse.

18Hasoao i Tsiône ami’ty fatariha’o;

atroaro o kijoli’ Ierosalaimeo.

19Izay vaho ho no’o

o sorom-bantañeo:

o soroñe oroañeo naho soroñ’ añoñeo;

le hengaeñe bania ambone’ i kitreli’oy.