Sabo 37

Sabo’ i Davide

1א Ko embetse amo tsivokatseo,

vaho ko tsikirihe’o o mpanao ratio,

2F’ie hiforejeje aniany hoe ahetse,

vaho hiheatse hoe rongo-maindoñe.

3ב Miatoa am’ Iehovà, le anò ty soa;

imoneño i taney

vaho rañeto ty figahiñañe.

4Mifalea am’ Iehovà; le hatolo’e azo

ty fisalalàn’ arofo’o.

5ג Ampiatò am’ Iehovà ty fombà’o,

Atokiso, vaho ie ty hitoloñe.

6Le hampionjone’e hoe hazavàñe

ty havantaña’o,

vaho hoe an-tsipinde-mena

ty havañona’o.

7ד Manintsiña am’ Iehovà

naho mahaliñisa;

ko ihobira’o ty miraorao an-tsata’e,

t’indaty mitoloñ’ am-pikitrohan-dratio.

8ה Fario o habosehañeo, naho apoho ty fombo;

ko embetse kera hañosi-karatiañe.

9Toe haitoañe o tsy vokatseo,

fa handova i taney ze mitamà Iehovà1.

10ו Aniany le tsy ho eo i lo-tserekey,

ho tsoehe’o i akiba’ey f’ie tsy ho trea.

11Toe handova i Taney o tretram-poo,

hifale am-piraoraoañe vokatse.

12ז Kililie’ i lo-tsereke ty vantañe,

vaho ampikodrita’e nife.

13Iankahafa’ i Talè,

fa arofoana’e te an-­titotse ty andro’e.

14ח Fa napontsoa’ o tsivokatseo

ty fibara,

vaho nampibitsoke fale

hametsaha’e ambane

o rarakeo naho o misotrio,

hañohofa’e loza

amo an-dala mahitio.

15Hitrofaha’ i fibaray ty tro’ iareo,

vaho ho pekañeñe ty fale’ iareo.

16ט Hamake ty ­kedekedek’ anaña’

ty vantañe

ta ty havokara’ o tsivokatse maroo.

17Toe ho pozaheñe ty sira’ o lo-tserekeo,

fe tohaña’ Iehovà o vañoñeo.

18י Arofoana’ Iehovà ty andro’

o vantañeo,

tsy ho modo kitro añ’afe’e ty lova’iareo;

19Tsy ho salatse an-tsan-karatiañe;

le ho anjañe an-tsam-paosa.

20כ Hikoromake o tsy vokatseo,

le hanahake ty safon’ añondry

o rafelahi’ Iehovào,

ie himosaoñe an-katòeñe,

toe himiañe.

21ל Misongo i tsivokatsey

fe tsy mañavake;

matarike i vantañey vaho mañomey.

22Toe handova i taney o tahie’eo,

fe haitoañe añe o afà’eo.

23מ Ampijadoña’ Iehovà

ty lia’ ondaty, ie no’e i lala’ey.

24Ndra t’ie mikorovoke

tsy hidaboñe,

fa tohaña’ Iehovà am-pitàñe.

25נ Nitora’e iraho,

fa antetse henaneo,

mboe liako tsy nahatrea te

naforintseñe o vañoñeo,

te nangata-kaneñe o keleia’eo.

26Matarike lomoñandro re naho

mampisongo, vaho vokatse o tiri’eo.

27ס Ihankaño ty raty, le anò ty soa,

vaho himoneñe kitro añ’afe’e.

28Tea’ Iehovà ty hatò,

le tsy ho farie’e o mpañorike i Ha’eio;

soa-fipalitse nainai’e iereo;

fe haitoañe ty tiri’ o lo-tserekeo.

29ע Handova i taney o vañoñeo, vaho himoneñe nainai’e.

30פ Mañaka-kihitse ty falie’ o vantañeo,

manao saontsi-to i famele’ey.

31Añ’arofo’e ao ty Hàn’Añahare’e2,

tsy midorasitse o fandia’eo.

32צ Tampone’ ty tsivokatse ty vantañe, mipay hañè-doza ama’e.

33Fe tsy hapo’ Iehovà an-taña’e ao,

vaho tsy hado’e hafàtse an-jaka.

34ק Itamao t’Iehovà,

naho ambeno i lala’ey,

le honjone’e handova i taney,

vaho ho isa’o ty fañitoañe o tsivokatseo.

35ר Fa nitreako ty lahiaga, tsivoatsolo,

nandrevake hoe hatae maindoñe

an-tane’e ao;

36Fe nihelañe añe, le heheke, tsy eo;

pinaiko fa tsy nahatrea.

37ש Henteo ty vañoñe, hehe i vantañey, ho soa-figadoñe ty mifampilongo.

38Fe hatrao-­karotsake o mpandilatseo

vaho ho tomereñe ty figadoña’

ty lo-tsereke.

39ת Boak’ am’ Iehovà

ty fandrombahañe o vañoñeo,

Ie ty fitsoloha’ iareo an-tsàm-poheke.

40Imbàe’ Iehovà naho votsore’e;

haha’e amo ­tsivokatseo vaho rombahe’e,

amy te Ie ty fipalira’ iareo.