Sabo 25

Sabo’ i Davide

1א Ihe, ry Iehovà !

ro añonjonako fiaiñe.

2ב O ry Andrianañahareko,

ihe ro fiatoako,

ko anga’o ho salaren-draho; ko apo’o ho giohe’ o rafelahikoo.

3ג Eka ndra ia ia mitamà azo

tsy hiolitsolitse; fe hilolidolitse

o mamañahy tsy aman-dengo’eo.

4ד Ampahafohino ahy o lala’oo,

ry Iehovà,

anaro ahy o oloñolo’oo.

5ה Iaolò ami’ty hatò’o, le anaro;

Ihe Andrianañaharem-

Pandrombahañe ahy;

Ihe ro fitamàko lomoñandro.

6ו Tiahio ry Iehovà ty fiferenaiña’o

naho ty hafatram-pikokokoa’o,

ie fa toe haehae.

7ז Ko tiahie’o o ­hakeom-paha-torakoo

naho o fiolàkoo,

fe tiahio ankalèn’arofo’o,

ami’ty hatrentra’o, ry Iehovà,

8ח Soa naho vantañ’arofo t’Iehovà,

izay ty anoroa’e o manan-tahiñeo

i lalañey.

9ט Iaoloa’e ami’ty hatò o mpirèkeo, vaho anare’e amo sata’eo ty tretram-po.

10י Songa fiferenaiñañe

naho figahiñañe o lala’ Iehovào,

amo mpiambeñe i fañina’ey

naho o taro’eo.

11כ Amy tahina’oy, ry Iehovà,

apoho o hakeokoo, fa bey.

12ל Ia ty’ ndaty mañeveñe am’Iehovà?

ho toroa’e ty lalan-tsoa ho joboñe’e.

13מ Hiaiñ’añ’oleñañe ty fiai’e;

handova i taney o tarira’eo

14נ Avere’ Iehovà o mañeveñe ama’eo;

le ampahafohine’e iareo i fañina’ey.

15ס Mitolike mb’am’ Iehovà

nainai’e o masokoo,

amy te Ie ro mañakats’ o tombokoo

ami’ty harato.

16ע Mitoliha amako le iferenaiño, fa mijorìñe naho misotry.

17צ Miebotse ty haemberan-troko,

afaho amo hasosorakoo.

18ק Vazohò ty hasotriako

naho ty falovoloiako;

vaho apoho o hakeokoo.

19ר Vazoho o rafelahikoo, te maro;

heje’ iareo am-palai-mena iraho.

20ש Ambeno o fiaikoo, hahao,

le ko ado’o ho salareñe,

amy te Ihe ro fipalirako.

21ת Hañaro ahy o havañonañeo

naho o havantañañeo;

fa mitamà Azo iraho.

22פ Jebaño t’Israele,

ry Andrianañahare

amo haembera’e iabio