Sabo 17

Halali’ i Davide

1Janjiño ty fahiti’e, ry Iehovà,

haoño ty fitoreoko,

anoloro ravembia ty halaliko

boak’an-tsoñy tsy amam-pìtake!

2Ampionjono boak’ añatrefa’o eo

ty añomezan-to ahiko !

Ampivazoho mahity o fihaino’oo !

3Fa nitsohe’o ty troko,

naho nitilihe’o te haleñe

naho nadiñe’o,

vaho tsy nahavazoho

ty tsy mañeva miakatse am-bavako.

4Aa ty amo sata’ ondatio,

o tsaram-pivimbi’oo ro nambenako

tsy hombàko ty lala’ o masia-menao.

5Fa mifahatse amo lala’oo o liakoo, tsy midorasitse o tombokoo,

6Ho kanjieko irehe, amy te toiñe’o

ry Andrianañahare;

atokilaño mb’amako o

ravembia’oo, janjiño o tarokoo.

7Aboaho an-kasoa ty fiferenaiña’o,

Le rombaho am-pità’o havana

amo miatreatreo, o mitsolok’ama’oo.

8Faharo iraho hoe te saintem-pihaino’o!

aetaho añalon-talinjon-ela’o ao;

9ty amo lo-tsereke mamaokeo,

o rafelahiko mpañoho-doza

miarikoboñe ahikoo.

10Nakiti’ iereo o tro’ iareo von­drakeo;

mivola ­firengevohañe o vava’ iareoo.

11Fa sinarokoho’ iareo o lia’aio henaneo;

nikirofeñe maso hametsake anay an-tane eo;

12Manahake ty liona

milelalela t’ie handrimitse,

hoe liona tora’e mipiapia añ’etak’ ao,

13Miongaha, ry Iehovà,

atreatréo, goreo ambane!

Hahao amo lo-tserekeo ty fiaiko,

amy fibara’oy,

14am’ondatio—am-pità’o ry Iehovà—

am’ ondati’ ty tane toio,

fa an-kaveloñe atoy avao ty anjara’e;

ie vontsiñe’o amo vara’oo o fisafoa’eo; henek’ anake iereo; vaho ampandova’ iareo an-tiri’ iareo ty nivokara’ iareo.

15Naho izaho, ho treako an-kavañonañe ao ty lahara’o; hifale iraho te tsekake

mahatrea ty vinta’o.