Sabo 142

1Fañòha’ i Davide; ty Halali’e tan-dakato ao

Mitoreo am-peo am’ Iehovà iraho,

hihalaly tretre am’Iehovà ty feoko.

2Adobako añatrefa’e ty toreoko;

volañeko añatrefa’e o mahaferenaiñe ahikoo.

3Ie nitoirañe añ’ovako ao ty troko,

niarofoana’o ty liako,

amy lalan-tsileke fijelanjelañakoy

ty nañetaha’ iareo fandrike.

4Toliho mb’an-tañan-kavanako

le vazohò, te tsy eo ty mañaoñ’ ahy.

tsy eo ty hipalirako;

tsy ahoa’ondaty ty fiaiko.

5Nitoreo ama’o iraho ry Iehovà,

ami’ty hoe : Ihe ro fitsolohako, ty anjarako an-tanen-kaveloñ’ ao.

6Janjiño ty fikaikaihako

fa loho mirèke; hahao amo mpanao

samporerak’ ahiio, fa fatratse te amako.

7Akaro am-balabey ao ty fiaiko hibangoako ty tahina’o;

hiropak’ amako o vañoñeo

ami’ty fatariha’o amako.