Sabo 12

Ho a i Talèn-tsakeray; an-Tali-Valo, Sabo’ i Davide

1Rombaho, ry Iehovà,

fa tsy eo ondaty matarikeo;

mimosaoñe amo ana’ ondatio

o migahiñeo.

2Hene mifandañitse aman-drañetse

ondatio, reke-tsoñy mitsiriry

naho troke-miroe-rehake.

3Haitoa’ Iehovà

ze hene fivimby mandomboke,

naho ty fameleke mitrè fibohabohàñe,

4ami’ty hoe: O lela’aio ro handreketa’ay; anay o soñi’aio;

ia ty mpifehe anay?

5Ty fampisoañañe o rarakeo,

naho ty fitoreova’ o mpisotrio,

ty iongahako henaneo, hoe t’Iehovà,

Fa hampipalireko amy isehasehà’ey.

6Fetse ki’e o fepè’ Iehovào,

volafoty nitsoheñe an-toñan-tsini-hara;

nitranaheñe im-pito1.

7Arovo irezay ry Iehovà,

ambeno ami’ty tariratse toy

nainai’e donia,

8Mitsapiotsapioke mbeo’ mbeo

o tsivokatseo,

naho onjoneñe amo ana’ ondatio

ty haloloañe.