Sabo 109

Ho a i Talè, Sabo’ i Davide

1Ry Andrianañaharem-pandrengeako, Ko mianjiñe,

2fa nasoka’ iareo amako ty vava raty

naho ty vavam-pamañahiañe

fa nifosa ahy an-dela mibodiake.

3Niarikoboña’ iareo am-pivolam-palaiñañe;

vaho nialy amako tsy am-poto’e.

4Manisý ahy iereo ho valem-pikokoako,

izaho mpitalaho.

5Tinambe’ iareo raty hasolo ty soa naho falaiñañe hasolo ty fikokoako.

6Tendreo ty lo-tsereke hifehe aze,

ampijohaño am-pitàn-kavana’e

ty mpañinje,

7ie zakaeñe, ampiboaho te voa,

le hatao tahiñe i fisolohoa’ey.

8Ho tomoreñe o andro’eo,

vaho ho tavaneñe i fitoloña’ey.

9Le ho bode-rae o ana’eo vaho ho ramavoy ty vali’e.

10Ho mpangatake miriorio o ana’eo;

hipay ty lintse’iareo am-bangiñe añe.

11Hifetreha’ ty mpampisongo

ze hene vara’e;

naho ho volose’ o ambahinio

ty tolin-kamokora’e.

12Ee t’ie tsy ho am-piferenaiñañe,

naho leo raike tsy hitretre

o ana’e bode-raeo

13Haitoañe o tiri’eo,

vaho ho faopaoheñe

ami’ty tariratse handimbe ty añara’ iareo.

14Le ho tohineñe am’ Iehovà

ty hakeon-drae’e;

naho tsy ho faoheñe ami tahin-drene’e.

15Ho aolo’ Iehovà nainai’e abey iereo,

soa te hapitso’e an-tane atoy

ty fitiahiañe iareo.

16Amy te namoea’e ty hiferenaiñe,

te mone nampisoañe ondaty rarake naho poie’e, naho ty mioremeñe,

hañohofa’e loza.

17Ie nimpitea onjitse, le nifotetse ama’e, nalain-tata re, le nihànkaña’e.

18Nanaroñe aze hoe sarimbo

ty fañompà’e;

nizilik’ an-tro’e ao hoe rano,

naho hoe solik’ an-taola’e ao.

19Ho ama’e manahake

ty lamba iombea’e, naho hoe

ty sadia fidiaña’e.

20Izay ty paia’ o malaiñe ahio

hanoe’ Iehovà amako,

o mañofoke ty fiaikoo.

21F’Ihe, ry Iehovà Talè,

ano amako sazò i tahina’oy;

ami’ty hasoa ty fiferenaiña’o, ihahao,

22fa misotry naho rarake,

naho fere ty troko añ’ovako ao;

23zaho mimian-koe talinjo mitibake

vaho nahifik’ añe hoe valala.

24Mitrezontrezo ty ongoko fa mililitse;

vaho boroka ty sandriko,

tsy aman-tsolike.

25Ifosàñe, te isa’ iareo,

le akofikofi’iareo loha.

26Imbao iraho, ry Iehovà

Andrianañahareko; rombaho raho

ty amy fiferenaiña’oy.

27Hahafohina’ iareo t’ie i fità’oy,

te Ihe ry Iehovà, ro mitoloñe.

28Angao hamàtse iereo,

f’ihe mitahia;

ie mitroatse le ho salatse,

fe ho fale ty mpitoro’o.

29Hampisikineñe hameñarañe

o mpanesek’ ahikoo,

naho hiholonkoñan-kasalarañe

hoe sarimbo.

30Honjone’ ty vavako ­fañandriañañe t’Iehovà;

ho rengeko añivo’ i màroy.

31Amy t’ie mijohañe

am-pitàn-kavana’ ty poie’e,

hañaha’e amo mpanisì’ azeo.