Sabo 105

1Andriaño t’Iehovà,

kanjio ty tahina’e;

ampahafohino ondatio o fitoloña’eo.

2Isabò, rengeo an-tsabo;

talilio o raha fanjaka nanoe’eo.

3Mitreña, amy tahina’e masiñey;

ampirebehañ’ añ’arofo’ o mipay Iehovào.

4Paiavo t’Iehovà naho ty haozara’e;

tsoeho nainai’e ty lahara’e.

5Tiahio o raha fanjaka nanoe’eo, o halatsañeo, naho

o fizakam-palie’eo.

6Ry tarira’ i Avrahame mpitoro’eo, ry ana’ Iakobe jinobo’eo;

7Ie t’Iehovà Andrianañaharentika;

mahaatseke ty tane toy o fandilia’eo.

8Toe tiahi’e nainai’e i fañina’ey,

i tsara linili’e pak’an-tarira’e fah’arivo’e,

9i nanoe’e amy Avrahamey,

naho i nifantà’e am’ Ietsakey,

10vaho niventè’e am’Iakobe ho fañè,

amy Israele ho fañina nainai’e:

11ami’ty hoe : Hatoloko azo ty tane’

Kanàne, ty anjara lova’o.

12Ie ondaty mbe nitsiampeampe,

toe nitsiampe, mbore nirenetane ama’e,

13ie nitsatsà-tane mb’an-tane, boak’am-pifeheañe raike

sikal’am’ondaty ila’eo.

14tsy nimetea’e ho lovilovie’ ondatio;

le trinevo’e o mpanjakao ty am’ iereo:

15Ko mitsipaoke o norizakoo;

le ko joie’ areo o mpitokikoo.

16Le nikanjie’e san-kerè o taneo,

fonga nifolahe’e o tahon-kaneñeo;

17Nirahe’e t’indaty hiaolo iareo,

Iosefe naletake ho ondevo.

18Jinoi’ iareo am-bahotse o fandia’eo,

najo am-po viñe ao i sandri’ey,

19ampara’ ty andro nañenefañe

i nitokia’ey,

namente aze ty tsara’ Iehovà.

20Nafanto’ i mpanjakay le nabalake re,

hinaha’ ty mpifehe’ ondatio,

21Nanoe’e talèn’ anjomba’e naho mpamandroñe o vara’eo,

22nifehe o roandria’eo an-tsatri’e,

nanoro hihitse amo androanavio.

23Nimoake e Mitsraime ao ka t’Israele,

nitaveañe an-tane’ i Kame añe t’Iakobe.

24Le nampanaranahe’e ondati’eo;

vaho nampaozare’e

ambone’ o rafelahi’iareoo

25Nampifotere’e ty arofo’ iareo

halaiñe ondati’eo,

hikinia o mpitoro’eo.

26Nirahe’e t’i Mosè mpitoro’e,

i Aharone jinobo’ey.

27Nanoe’ iereo añivo’ iareo eo

o raha tsitantane’eo,

naho halatsàñe an-tane’ i Kame ao.

28Nañitrifa’e ieñe,

le nampimoromoroñe’e,

vaho tsy niolà’ iareo o tsara’eo.

29Novae’e ho lio ty rano’ iareo,

naho zinama’e o fia’ iareoo.

30Nisamborian-tsahoñe ty tane’ iareo,

añ’efem-pandrea’ o mpanjaka’ iareoo.

31Nitsara re, le niropahen-daletse,

naho nandrambañe ty tane’ iareo

ty haon-doha.

32Tinolo’e havandra hisolo orañe,

naho afo nilebaleba an-tane’ iareo.

33Finofo’e o vahe’eo naho o sakoa’eo,

vaho tsineratsera’e o hatae an-tane’iareoo.

34Nisaontsie’e, le nimb’eo o betratrao,

naho ty kijeja tsy fotofoto;

35hene navorembore’ iereo ze naindoñe

an-tane’ iareo ao,

fonga nabotseke ty vokan-tane’ iareo.

36Nampivetrahe’e iaby ka

o tañoloñoloñan-tane’ iareoo,

ze hene lengom-boan- kaozara’iareo.

37Le nakare’e reketse volafoty

naho volamena t’Israele,

leo raike tsy nitsikapy amo rofoko’eo.

38Nifale t’i Mitsraime t’ie niakatse,

fa nivotraha’ ty fihembañañe.

39Nandafiha’e rahoñe ho fialofañe,

naho afo ho fañazavàn-kaleñe.

40Nihalaly iereo le nanjotsoa’e

hatrakatrake,

nampieneña’e mahakaman-dikerañe.

41Sinoka’e i lamilamiy,

le nidoandoañe ty rano

nikararake an-dratraratra ao hoe saka.

42Fa nitiahi’e i tsara’e masiñe amy Avrahame mpitoro’ey.

43Le naaka’e am-pirebehañe ondati’eo,

am-pazake o jinobo’eo;

44natolo’e ty tane’ o kilakila ondatio,

vaho rinambe’ iareo ho lova

o nimokora’ ondatioo:

45soa t’ie hañambeñe o fañè’eo

vaho hañorike i Tsara’ey.

Treño t’Ià !