Sabo 103

Sabo’ i Davide

1Andriaño t’Iehovà, ry troko;

naho ze hene amako;

bangò ty tahina’e masiñe !

2Andriaño t’Iehovà ry troko, le ko haliño o hasoa’e iabio.

3I mpañaha ze hene hakeo’oy, ie mpanaha ze atao arete’oy.

4I mijebañe ty fiai’o boak’an-koboñ’aoy,

ie mañohò azo am-piferenaiñañe

naho am-pitretrezañe,

5ie mahaeneñe ty havelo’o an-draha soa,

naho vaoe’e hoe vantio ty hajalahi’o.

6Manao ty hahiti’e t’Iehovà

naho mitolon-kavantañañe

amy ze hene volevolèn-draha.

7Nampahafohine’e amy Mosè o sata’eo

o tolon-draha’eo amo ana’ Israeleo.

8Miferenaiñe naho mitretre t’Iehovà,

malaon-kaviñerañe,

vaho enem-pikokoa-migahiñe.

9Tsy handilo nainai’e re,

tsy hangazoña’e kitro katroke

ty fifombo’e.

10Tsy nanoe’e mañeva o tahin-tikañeo,

tsy nililove’e ty amo hakeo’ tikañeo.

11Fa mira ami’ty haabo’ i likerañey

ami’ty tane toy,

ty hajabajaba’ ty fiferenaiña’e

amo mañeveñ’ama’eo;

12Mira ami’ty halavi’ i atiñanañey

amy ahandrefañey,

ty halavi’ ty nampisitahe’e amantika o fiolàn-tikañeo.

13Hambañe ami’ty halèm-pon-drae

amo ana’eo

ty fitretreza’ Iehovà amo mañeveñe ama’eo,

14amy te arofoana’e ty vintan-tika;

tiahi’e t’ie lemboke.

15Aa naho ondaty,

hoe ahetse o andro’eo

hoe voñe an-kivok’ ao ty fandrevaha’e;

16ie iarian-tioke, le tsy eo ka,

vaho tsy mahatiahy aze i toe’ey.

17Fe boake haehae tsy amam-pipotora’e añe, sikal’ami’ty tsy modo añe, ty fiferenaiña’ Iehovà amy ze mañeveñe ama’e,

naho i havantaña’ey

amo ana’ o anakeo—

18ho amy ze miambeñe i fañina’ey

vaho mahatiahy o taro’eo hanoa’e.

19Fa naore’ Iehovà

an-dindiñe ao ty fiambesa’e,

vaho mamehe ze he’e i fifehea’ey.

20Andriaño t’Iehovà, ry Anjeli’e, ra’elahy an-kaozarañe,

mitoloñe amo tsarae’eo,

mañaoñe ty fiarañanaña’ o tsara’eo.

21Andriaño t’Iehovà,

ry hene lahin-defo’eo,

ry mpitoro’e mpanao

o satrin’ arofo’eo.

22Andriaño t’Iehovà, ry hene sata’e

tok’aia tok’aia amy fifehea’eio.

Andriaño t’Iehovà, ry fiaiko.