Razan-tSaontsy 5

Hatahata amo Haleorañeo

1O anake, tsendreño ty hihiko;

atokilaño mb’am-pahilalako ty sofi’o,

2hifejaña’o ty filie-batañe, naho hañaja hilala o soñi’oo.

3Mitsopa-tantele ty soñin-tsimirirañe,

vaho malama te amo solikeo ty vava’e;

4f’ie mafaitse te amo vahon-tsoiñeo am-para’e,

masioñe hoe fibara sambe-lela’e.

5Mizotso mb’am-pikoromaham-beo

o tombo’eo,

mitalifitse mb’an-tsikeokeok’ ao ty lia’e.

6Tsy haraharae’e i lalan-kaveloñey; mihelahela o lala’eo, fe amoea’e.

7Aa le mitsanoña ahy henaneo ry anake, vaho ko mivike amo entam-bavakoo.

8Ahankaño lavits’ aze ty lala’o,

vaho ko itotofa’o ty sariran-akiba’e;

9tsy mone hatolo’o ami’ty ila’e ty enge’o,

naho o tao’oo amy mifajifajiy,

10mbore hampibo­boke ty ambahiny

ty haozara’o,

vaho mb’añ’akiba’ ty alik’ama’o

o nimokora’oo;

11Hiñeoñeon-drehe

añ’andron-kònka’o,

ie mihomake ty nofo’o naho ty sandri’o,

12ami’ty hoe:

Akore te nalaim-pandilovan-draho,

naho niheje’ ty troko o endakeo!

13Tsy nitsendreñeko ty fiarañanaña’

o mpañanakoo,

tsy nanokilañako sofiñe

o mpañoke ahikoo.

14Fa an-titotse ho nianto iraho,

añivo’ ty fivory naho i valobohòkey.

15Minoma rano an-kadaha’o avao

rano midoañe boak’an-tatefatse’o ao.

16Hienene mb’an-dalambey mb’eo hao

ty rano’o migoangoañeo?

rano hitsiritsiok’ an-damoke eo?

17Ehe t’ie azo,

fa ko andiva’o ami’ty ambahiny.

18Ho soa-tata ty fipotitiaha’o,

vaho irebeho ty valin-katora’o.

19Hirañe mikoko re,

renen-kira maintelèñe—

hampaheneñe azo nainai’e o fatroa’eo,

i fikokoa’ey avao ty hilosora’o.

20Akore, anake, t’ie tsepahe’ ty karapilo?

naho fihine’ ty arañan’ ambahiny?

21Sindre añatrefam-pihaino’ Iehovà

o lala’ ondatio,

Songa tsikarahe’e o lalan-tsile’eo.

22Ho fandrihe’ ty hatsivokara’e

ty lo-tsereke,

vaho hamihiñe aze am-bahotse

o hakeo’eo.

23Hikenkan-dre fa po-hilala,

ty halosoran-kagegea’e ty hampivike aze.