Razan-tSaontsy 26

1Hoe fanala añ’asara,

ndra orañe an-tsam-pitatahañe,

ty tsy fañevà’ i dagolay fiasiañe.

2Hoe ty fikepakepaha’ ty hitikitike

naho ty fitiliñam-polinjà,

ty tsy ipetaham-patse

te tsy amam-bente’e.

3Ty fikiso ho ami’ty soavala,

naho ty laboridy ho ami’ty borìke,

vaho ty kobaiñe ho an-dambosi’ i dagola.

4Ko toiñe’o ami’ty hanè’e i seretse,

hera hanahak’ aze.

5Valeo mañeva’ i hagegea’ey ty dagola,

tsy mone hahihitse ami’ty maso’e.

6Hoe mañitsike tomboke

naho migenoke voreke,

ty mampisangitrike taratasy

am-pitàn-dagola.

7Maletraletra ty fandia’ i kepeke,

naho ty razan-drehak’ am-bava’

o seretseo.

8Hoe mañombe vato am-piletse,

ty miasy i gegegege.

9Hoe fatike mipok’ an-taña’ i jike,

ty razan-drehak’ am-bava’ i dagola.

10Ie mampitoloñe ty seretse,

le manahake te mañeke mpandrioñe.

11Hoe amboa mimpoly ami’ty loa’e,

ty dagola mamereñe ty hagegea’e.

12Tsy fa nahaisake ondaty mahihitse

am-pihaino’e hao irehe?

bey ty fitamà’ i seretsey ta ty aze.

13Hoe ty votro,

Inao liona ty an-damoke eo!

Midada an-dalañe ey ty liona!

14Manahake ty figavingavin-dalañe

amo soavili’eo,

ty tembo am-pandrea’e eo.

15Ajo’ i votro am-po finga ao ty taña’e,

fe tsy lefe’e ty minday aze mb’am-bava’e.

16Mahihitse ami’ty maso’e ty tembo,

te ami’ty fito-lahy manoiñe

an-kavantañañe.

17Hambañ’ ami’ty mitsepak’ amboa an-tsofi’e,

ty mpandrioñe mihilintsioñe

ami’ty aly tsy aze.

18Hoe ty derendereñe mañiririñe

raha mibelañe, naho ana-pale,

vaho fampihomahañe,

19ty mamitake ondaty ami’ty hoe:

Nisolesole avao iraho.

20Mate ty afo tsy aman-katae,

modo ka ty dabasida tsy aman-tsikotsiko.

21Hoe sarebò ami’ty foroha mirekake,

naho hatae ami’ty afo,

ty famiaña’ i mpanao tsikoniy

hañolaña’e aiñe.

22Hoe kenoke mafiry

ty fivolam-pitàngogo,

ie migodoñe mb’añ’ova lalek’ ao.

23Hoe valàñe-tane nihamineñe

taim-piram-bolafoty

ty fameleke ampirehetan-

kelok’ an-troke ao.

24Añonohonoa’ ty famele’e i falaiña’ey,

fe añaja’e famañahiañe ty an-tro’e ao.

25Ndra t’ie mirehake fañisohañe,

ko iantofa’o,

fa pea tiva fito ty an-tro’e ao.

26Aeta’e am-pitake ty halò-tsere’e,

fe hiboak’ am-pivory ao ty haloloa’e.

27Higodoñe an-koboñe ao ty nihaly aze,

himpoly ama’e ty vato navarimbari’e.

28Heje ty famele’ i remborake o jinoi’eo,

mampianto ka ty falie manao kabeake.