Razan-tSaontsy 24

1Ko kirañe’o o lo-tserekeo,

ko mañiry ho mpiam’ iareo.

2Fa mikitroke hapiaroteñe

ty ron-doha’iareo,

vaho mivolan-tsiroe-tafatoe o soñi’eo.

3Hihitse ty mahafonitse anjomba,

vaho hilàla ty añorizañe aze;

4Fahafohinañe ty mahapea o efe’eo

amy ze hene vara soa naho mahafale.

5Maozatse t’indaty mahihitse,

manovon-kafatrarañe ty mahilala;

6amy te fiaoloañe mahihitse

ty ifanehafa’o amo ali’oo,

vaho minday fandrebahañe

ty hamarom-piaolo.

7Loho ambone’ i seretsey ty hihitse;

ie tsy manoka-palie an-dalam-bey eo.

8Hatao mpikitro-draha

ty mikilily hanao raty.

9Hakeo ty mikitro-kagegeañe,

vaho tiva am’ondatio ty mpañinje.

10Vata’e tsy an-kaozaran-drehe t’ie mitoirañe añ’andron-kaemberañe.

11Hahao o kozozotem-

bam-pandentañe mb’eoo,

ie midaliendalieñe

mb’am-panjamanañe mb’eo,

Ehe, kalaño!

12Aa naho manao ty hoe irehe,

Inao! tsy napota’ay ‘nio!—

Tsy mahatsikarake izay hao

i Mpandanja arofoy?

tsy arofoana’ i Mpañambem-piai’oy hao?

Tsy havaha’e am’ondatio hao o sata’eo?

13O anako, mihinana tantele, amy te soa,

eka, mamy an-dañilañy ao

ty tantele boak’ am-papi’ey.

14Maharendreha te izay ty hihitse

ami’ty fiai’o; ie trea’o

le ho tendrek’ ama’o ty ho avi’o,

vaho tsy haitoañe ty fisalalà’o.

15Ko vandroñe’o, ty tsereheñe tia,

ty anjomba’ i vañoñey;

ko joie’o ty akiba imoneña’e;

16fa mikorovoke im-pito ty vantañe,

le mbe mitroatse avao;

fe mivembeñe añ’andron-kankàñe

o lo-tserekeo.

17Ko irebeha’o ty fihotraha’ o rafelahi’oo,

vaho ko ado’o hifalea’ ty tro’o

i fitsikapia’ey.

18fa ho vazoho’ Iehovà

naho ho alihe’e

vaho havì’e tsy ho ama’e i haviñera’ey.

19Ko angovita’o o tsivokatseo,

le ko itsikiriha’o o lo-tserekeo;

20fa tsy aman-ko tamae’e ty tsereheñe;

le hakipe ty failo’ i borololoy.

21O anake, mañeveña

am’ Iehovà naho amy mpanjakay,

le ko mitraok’ amo mpiolao,

22fa hivovoa’ ty feh’ ohatse,

vaho ia ty hahafohiñe

ty fifetsaham-piantoañe

hanoe’ i roroey?

23Manoly o tsara retoañe ka

o mahihitseo:

Tsy mete an-jaka ao ty firihiañe.

24Ze manao ty hoe amo aman-kakeoo:

‘Vantan-drehe,’ ro honjira’ i màroy;

vaho ho heje’ o fifeheañeo;

25fe ho ehake o mahafañendakeo

vaho ho soa tata.

26Orofeñe o fivimby mahatoiñe

an-kahiti’eo.

27Henefo heike ty fitromaha’o alafe’e ao

naho halahalao o tete’oo,

vaho ranjio amy zao ty akiba’o.

28Ko sesehe’o, tsy amam-poto’e t’indaty;

vaho ko mamañahy am-pivimby.

29Ko manao ty hoe:

Hanoako hambañe amy nanoa’e ahikoy;

sindre havahako ty amy sata’ey.

30Niozàko ty tete’ i tembo,

niariako ty tanem-balobo’ i seretse;

31hehe t’ie nioboñobom-patike;

nilafihan-kisatse i taney,

vaho narobake ty kijolim-bato’e.

32Ie nitreako le naereñereko,

nenteako vaho nitendrek’ anatse.

33Firotse kede, mandre betebeteke,

mañohom-pitañe hiroro,

34le hikovovoke mb’ama’o ty hararahañe,

vaho hoe lahin-defoñe ty hapoia’o.