Razan-tSaontsy 10

Taron-Kilala’ i Selomò

1O razan-dreha’ i Selomòo.

Mahaehak’ an-drae ty anake karafito,

fe mañore an-drene’e ty anadahy gege.

2Tsy manjofake ty vara niazo

an-kalo-tsere’e,

fa mañaha an-kavilasy ty havantañañe.

3Tsy apo’ Iehovà ho saliko ty vañoñe,

fe aveve’e ty hadrao’ o lo-tserekeo.

4Minday hararahañe ty satan-taña migebañe, fe mampañaleale

ty fità’ i mavitrikey.

5Anake mahihitse ty manontoñe ami’ty asara, fe minday hasalarañe ty anake

miroro am-pitatahañe.

6Fitahiañe ro añambone’ o vantañeo,

fe mañeta-piaroteñe

ty vava’ o lo-tserekeo.

7Mahahaha ty fitiahiañe o vantañeo,

fe hihomake ty añara’ o lo-tserekeo.

8Mañaon-dily ty arofo’ o mahihitseo1,

fe hianto ty gege mitolom-bolañe.

9Midraidraitse am-panintsiñañe

ty mpañavelo an-kavañonañe,

fe ho fohiñe ty mitsontike

an-dala mikelokeloke.

10Mampioremeñe ty mañieke,

vaho ho gorèñe ty gege mivolambolañe.

11Tsiritsiriohen-kaveloñe ty falie’ o vañoñeo, fe mañeta-piaroteñe

ty vava’ o lo-tserekeo,

12Mitrobo fifandierañe ty falaiñañe,

fe mandembeke ze atao fiolàñe

ty fikokoañe.

13Tendrek’ am-pivimbi’ o mahilalao

ty hihitse,

fe mañeva ty lambosi’

i po-hilalay ty kobaiñe.

14Mañaja hilala o mahihitseo,

fe antitotse ty fiantoañe ty vava’ o dagolao.

15Kijoly maozatse ty varam-pañaleale; fampiantoañe o rarakeo ty hapoia’iareo.

16Havelo ty tambe’ o vantañeo,

vaho fandilovañe

ty karama’ o lo-tserekeo.

17Mañori-dàlan-kaveloñe

ty mañaoñ’ anatse,

fe mandridrike ty tsy mipaok’endake.

18Aman-tsoñy mandañitse

ty mañetake falaiñañe,

vaho gege ty mampiboele dramotse.

19Tsy po-tahiñe ty maro rehake,

mahihitse ka ty maha-tam-pivimby.

20Volafoty hiringiri’e

ty famele’ o vantañeo;

fe tsy vente’e ty tro’ o lo-tserekeo.

21Mamahañe maro ty fivimbi’

o vantañeo,

fe mampivetrake ty dagola

te tsy aman-kilala.

22Ty fitahia’ Iehovà ro mampañaleale,

vaho tsy tovoña’e anahelo.

23Fihisà’ ty seretse ty mikilily,

fe hihitse ty ho amy t’indaty mahilala.

24Hifetsak’ amy lo-tserekey

ty ihembaña’e, fe hatolotse amy vantañey ty fisalalà’e.

25Ie misaok’ añe ty talio,

tsy eo ka i lo-tserekey,

fe mijadoñe nainai’e o vañoñeo.

26Hoe kile2 amo fihitsikeo,

naho hatoeñe amo fihainoo,

ty tembo amo mpañirak’ azeo.

27Fañalavañe andro

ty fañeveñañe am’ Iehovà,

fe ho tomoreñe ty tao’o lo-tserekeo.

28Hafaleañe ty fisalala’o vantañeo,

fe ho modo ty fitamà’ o lo-tserekeo.

29Rova maozats’ amo mahitio

ty làla’ Iehovà,

f’ie firotsahañe amo mpanao ratio.

30Le lia’e tsy hasiotse o vantañeo,

fe tsy himoneña’ o tsereheñeo i taney.

31Mamoa hihitse ty falie’ o vañoñeo,

fe haitoañe ty lela mitera.

32Apota’ ty fivimbi’ o mahitio

ze mete akareñe,

fe mengoke ty vava’ o lo-tserekeo.