Volily 24

1Aa kanao nioni’ i Balame te ninò’ Iehovà ty hitata Israele le tsy nisikilie’e nanahake i lili’ey fe nampitolihe’e mb’ am-patrambey eñe ty lahara’e. 2Aa naho niandra t’i Balame le nioni’e t’Israele nimoneñe an-kiboho’e ey nilahatse amo fifokoa’eo; le nivotrak’ ama’e ty arofon’ Andrianañahare; 3vaho nonjone’e ami’ty hoe ty razan-drehake,

Hoe ty fetse’ i Balame ana’ i Beore,

naho ty lañona’ ondaty

am-pihaino misokake.

4Ty enta’ ondaty mahajanjiñe

ty tsaran’Añahare,

naho mahaisake ty aroñaro’ i El-Sadai1, mibaboke

fe am-pihaino mibolanake:

5Fanjaka o kiboho’oo ry Iakòbe

naho o kivoho’oo ry Israele.

6Mivelatse hoe vavatane,

hoe kodobo añ’olon-tsaka,

hoe vahoñe nambole’ Iehovà

hoe mendoraveñe añ’olon-drano.

7Hidoandoan-drano o sihoa’eo

naho ho an-drano maro o tabiri’eo.

Mitoabotse ambone’ i Agage ty mpanjaka’e

vaho onjoneñe i fifehea’ey.

8Manahake ty tsifan-drimo mitiotiotse

t’i Andrianañahare nampiavotse aze amy Mitsraime.

Hampibotseke ze tane malaiñe aze

hampipozapozake o taola’eo,

hampitrofahe’e amo ana-pale’eo.

9Nitsakononòke re,

nanao fandrean-diona

naho hoe liona rene’e, ia ty hampitsekak’ aze?

Hene soa tata ze mitat’azo

Fonga ozoñeñe o mañozoñ’azoo.

10Nisolebotse amy Balame amy zao ty habose’ i Balake, le nifampitrabohe’e o fità’eo, naho hoe t’i Balak’ amy Bala­me, Nikanjiako haño­zoñe o rafelahikoo, vaho hehe te nitsitsihe’o tata in-telo. 11Mibioña arè mb’ an-toe’o añe, ie ho nonjoneko andi­kerañe eñe ty asi’o; te mone kinala’ Iehovà i ho ni-enge’oy. 12Le hoe t’i Balame amy Balake, Tsy vinolako hao o ìra’o nampihitrife’o amakoo ty hoe, 13Ndra te hatolo’ i Balak’ ahiko ty volafoty naho volamena mahaatseke i anjomba’ey, tsy ho likoareko ty falie’ Iehovà, hanoako ty soa ndra ty raty boak’ an-troko, fa ze nitsarae’ Iehovà ty ho taroñeko? 14Aa le himpoliako ondatikoo henaneo, fe adono hey hitoroako ty hanoe’ ondaty reroañe am’ondati’oo amo andro ampara’e añeo.

Fitokia’ i Balame Fahefatse

15Aa le nonjone’e ami’ty hoe i fandrazaña’ey:

Ty lañona’ i Balame ana’ i Beore,

ty taro’ ondaty am-pihaino nabeake.

16Ty kora’ i mpijanjiñe

o tsaran’ Añahareoy,

vaho ama’e ty fahafohinañe

i Andindimoneñey,

Oni’e ty aroñaro’ i El-Sadai

mibaboke fe am-pihaino mibeake:

17Treako fa tsy henaneo;

misamb’ aze iraho fe tsy mitotoke;

hiboak’ am’ Iakòbe ty vasiañe;

hionjoñe hirik’am’ Israele ty kobaiñe,

ho demohe’e o olon-tane’ i Moabeo

le fonga ho rotsahe’e o anam-pifandrakarakañeo.

18Ho fanañañe t’i Edome,

ho hanaña’ o rafelahi’eo t’i Seire,

le hitoloñ’ an-kafatrarañe t’Israele.

19Hiboak’ am’ Iakòbe ty hifehe,

handrotsake ty sehanga’ i Are.

20Ie nitalakese’e t’i Amaleke le nonjone’e ty fetse’e ami’ty hoe:

Nilohà’ o kilakila taneo t’i Amaleke,

Fe hamongorañe ty ho figadoña’e.

21Nisambae’e amy zao o nte-Keineo, vaho nañonjona’e fetse ami’ ty hoe:

Fatratse o fimoneña’oo

naho mioreñe an-damilamy eo ty akiba’o;

22fe ho forototoeñe t’i Kàine;

ampara’ mbia te ho tana’ i Asore an-drohy?

23Le nonjone’e ty fetse’e nanao ty hoe:

Hedey! Ia ty ho veloñe

naho akipen’ Añahare?

24Hitotsak’ eo o lakambey hirik’

añ’olo’ i Ketio,

ho silofe’ iareo t’i Asore

naho hampiambane’e t’i Aibere,

ampara’ t’ie mongotse nainai’e.

25Aa le niongake t’i Balame, nienga, naho nimpoly mb’an-toe’e añe; vaho nimb’ amy lia’e mb’eo ka t’i Balake.