Nakòme 1

1Ty talily i Ninevè1. Ty boken’ aroñaro’ i Nakòme2 nte-Elkose3.

2Mpamarahy t’i Andrianañahare,

Mpamale fate t’Iehovà;

Mpañondroke miforoforo t’Iehovà;

Mpañava-kabò amo rafelahi’eo t’Iehovà,

ie mañaja haviñerañe amo malaiñe azeo.

3Malaon-kaviñerañe t’Iehovà,

ra’elahy ty haozara’e,

fe tsy hapò’e tsy ho lafaeñe

o aman-kakeoo;

Iehovà: amo tangololahio

o lala’eo, naho ami’ty tio-bey ao;

o rahoñeo ro debom-pandia’e.

4Endaha’e i riakey le ampimaihe’e,

ampikarakankaiñe’e o sakao;

rinotsake t’i Basane naho i Karmele;

miheatse ty voñen-katae’ i Libanone.

5Miezeñezeñe aolo’e eo o vohitseo,

mitranake iaby o haboañeo,

forototo ty tane toy ami’ty fiatrefa’e,

ty voatse toy naho ze mpimoneñe ama’e ao.

6Ia ty mahafijohañe añatrefa’

o fifombo’eo?

Ia ty mahatambeloñe amy

fiforoforoan-kaviñera’ey?

Ailiñe hoe afo ty filevelevea’e,

avokovoko’e ambane iaby ze vato.

7Soa t’Iehovà, fipalirañe

añ’andron-kankàñe;

arofoana’e iaby o miato ama’eo. 8F’ie an-tsorotombahañe mivovò,

ty hamongora’e i toe’ey,

vaho ho roahe’e mb’ an-kamoromoroñañe ao o rafelahi’eo. 9Ino ze o fikililia’ areo am’ Iehovà zao?

Fa harotsa’e,

tsy hiongake fañindroe’e ty hekoheko. 10Fa manahake ty fivandiram-patike

naho ty hamamoa’ o jikeo,

ty hampangotomomoheñe iereo hoe ahe-maike. 11Boak’ ama’o ty niavia’

i nikitro-draha am’ Iehovày,

ie mañeretse hatsivokarañe. 12Hoe t’Iehovà:

ndra t’ie lifo-kaozarañe,

naho mitozantozañe,

mbe hampikorovoheñe,

vaho hihelañe añe;

fa ndra te nanilofeko irehe,

tsy ho silofeko ka. 13Hapozako ama’o henaneo ty joka’e,

vaho ho rafadrafateko o tali-randra’oo. 14Fa nandily ty ama’o t’Iehovà,

te tsy ho tongisañe ka ty tahina’o;

le haitoako amy akiban-drahare’oy

ty sare sokin-katae

naho ty sare natranake;

f’ie hanoako kibory,

amy t’ie tsy manjofake.