Malaký 1

1Fetse: ty tsara’ ­Iehovà am’ Israele añamy Malaký1.

2Fa nikokoako nahareo, hoe t’Iehovà,

le anoa’areo ty hoe:

Ami’ty akore ty nikokoa’o anay?

Aa tsy nirahalahi’ Iakobe2 hao

t’i Esave3? hoe t’Iehovà;

fe nikokoako t’Iakobe, 3naho nihejeko t’i Esave,

nampangoakoaheko o tamboho’eo,

vaho natoloko amo farasim-

patram-beio ty lova’e. 4Ie amy zao, hoe ty asa’ i Edome:

Finofok’ ambane zahay fe himpoly,

hamboara’ay o liolioo;

aa hoe t’Iehovà’ i Màroy:

Hamboatse iereo, fe harotsako ambane;

naho hatao tanem-piaroteñe i toetsey,

ie ondaty mahaviñetse Iehovà nainai’eo; 5Ho isa’ o fihaino’areoo,

vaho hanao ty hoe: Jabahinake t’Iehovà

alafe’ o efe-tane’ Israeleo. 6Miasy an-drae’e ty ana-dahy,

naho an-talè’e ty ondevo,

aa kanao izaho t’i Rae,

aia ty fiasiañe Ahiko?

Katao Talè iraho,

aia ty fañeveñañe amako?

hoe t’Iehovà’ i Màroy amo

mpisoroñe manirìka ty añarakoo.

Ie anoa’areo ty hoe:

Aia ty nanirikà’ay ty tahina’O? 7Ie mibanabana mofo maleotse amy kitrelikoy, naho manao ty hoe:

Akore ty nanivà’ay Azo?

Ie atao’ areo ty hoe:

Mavo ty fandambaña’ Iehovà 8Ie mañenga ty goa hisoroñañe,

tsy haloloañe hao?

Ie engaeñe ty mikotrile

naho ty aman-kandra,

tsy haratiañe hao?

Ibanabanao amy mpifehe’ areoy,

hifalea’e hao? ho no’e hao irehe?

hoe t’Iehovà’ i Màroy. 9Ie amy zao, naho miambane

hihalaly ty fañisohan’ Añahare,

hiferenaiña’e hao?

naho banabanae’areo izay?

Ho rambese’e soa v’inahareo?

Hoe t’Iehovà’ i Màroy: 10Ia ama’areo ty handrindriñe o lalakoo

tsy mone ho viañeñe an-kitreliko eo ty tsy vente’e!

Tsy mahafale ahy nahareo,

hoe t’Iehovà’ i Màroy, vaho tsy noko

o banabanam-pità’ areoo. 11Amy te boak’am-panjirihan’ andro añe pak’am-pitsofora’e,

le ra’elahy amo fifeheañeo ty añarako;

amy ze fañembohañe naho

fañengañe mahakama malio ami’ty añarako,

fa Ra’elahy amo kilakila’ ondatio

ty añarako,

hoe t’Iehovà’ i Màroy. 12F’ie teraterà’ areo,

ami’ty atao’ areo ty hoe:

Nivetàñe ty fandambaña’ i Talè,

naho o vokare’eo,

vaho tiva o mahakama’eo. 13Mbore atao’ areo ty hoe:

Hete! mahamokotse!

mbore injè’ areo,

hoe t’Iehovà’ i Màroy,

endese’ areo ty nitavaneñe,

ty mikotrile, naho ty boròka,

vaho engae’ areo hisoroñañe,

ho noko am-pità’areo hao? hoe t’Iehovà. 14Fàtse ty mpikatramo,

ie aman-kobatròke amy lia-rai’ey,

le ie mifanta: i aman-kàndray

ty engae’e amy Talè,

Izaho Mpanjaka ra’elahy,

hoe t’Iehovà’ i Màroy,

naho añeveñañe amo fifeheañeo

ty añarako.