Firovetañe 5

1Tiahio, ry Iehovà,

i nifetsak’ ama’ay zay;

vazohò vaho oniño ty fisalara’ay!

2Natolotse amo ambahinio ty lova’ay,

amo rene-taneo o akiba’aio.

3Bode zahay henaneo, toe bode rae;

remavoiñe o rene’aio.

4Tsy mete tsy vilie’ay ty rano hinome’ay; kaloeñe o hatae avori’aio.

5Ampisoañeñe o hatò’aio;

màmake zahay tsy maharendre-pitofàñe.

6Fa nanolo-pitàñe amy Mitsraime zahay

naho amy Asore,

hitakara’ay mofo mahàtsake.

7Nandilatse o roae’aio; tsy eo ka iereo;

zahay avao ty mivave o hakeo’eo.

8Fehe’ o ondevoo, fe tsy eo

ty hamotsots’anay am-pità’ iareo.

9Mampamoe’ aiñe

ty ahazoa’ay haneñe,

amy fibara an-dratraratray.

10Mahamainte ty holi’ay hoe toñake

I kerè matrovokey. 11Vahorañe e Tsione ao o rakemba’aio, naho amo rova’ Iehodào o somondrara’aio.

12Aradorado am-pità’e o roandriañeo;

tsy iasiañe ty lahara’ o androanavio.

13Azitse handisañe ty ajalahy

naho midaleandaleañe o jolingao te

mijiny hatae.

14Napo’ o androanavio ty lalam-bey,

nado o ajalahio ty bekobeko.

15Nijihetse ty hafalean’ arofo’ay;

nifotetse ho fandalàñe o tsinja’aio.

16Po-tsabaka zahay; feh’ohatse fa niota!

17Izay ty mahasiloke o tro’aio,

izay ty mahalopelope o fihaino’aio;

18toe i Vohi-Tsione mangoakoakey;

mitingañ’ ao o farasio.

19Fa Ihe ry Iehovà,

nainai’e tsy modo ty fifehea’o;

pak’amo tariratse fara-mandimbeo

ty fiambesa’o.

20Akore t’ie naforintse’o?

Amoea’o andro maro hao zahay?

21Ampolio ama’o, ry Iehovà,

hibodaña’ay; vaò manahake o andro taoloo o andro’aio—

22Fa naitoa’o zafezanake,

naho loho niviñera’o.