Iobe 8

1Nanoiñe amy zao t’i Bildade nte-Sohy:

2Pak’ombia te ho saontsie’o o raha zao?

Ampara ombia te ho tio-bey avao

o entam-palie’oo?

3Mengohen’ Añahare hao ty zaka?

Ampiolahe’ i El-Sadai

hao ty hatò?

4Ie nandilats’ azo o ana’oo,

le nasese’e ami’ty haozara’

o fiodia’eo.

5Aa naho nitsoehe’o t’i Andrianañahare vaho ty fiferenaiña’ i El-Sadai,

6naho malio naho vantan-drehe,

le hivañona’e

hampipoly i akiban-kavantaña’oy.

7Le ndra te nikede ty fifotora’o,

hitombo ho ra’elahy ty figadoña’o.

8Ehe añontaneo i sà’ taoloy vaho imaneo

o nitsikarahen-droae’eo,

9Bahimo tika fa toly omale avao,

mbore talinjo ambone’ ty tane toy o andron-tikañeo.

10Aa vaho tsy ho toroa’ iareo hao, hisaontsy ama’o, hañakatse entañe

boak’ añ’arofo’ iareo ao?

11Mahafitiry hao ty vinda

lehe tsy an-tane hinake?

Hitiry tsy aman-drano hao ty vondro?

12Ie maindoñe, tsy nibiraeñe,

le mbe miheatse aolo’ ze hene rongoñe.

13Izay ty lala’ o mañaliño

an’ Andrianañahareo;

toe modo fitamàñe ty tsy aman-Kake.

14Ie maràntsañe ty fiatoa’e;

naho fararotse ty fatokisa’e.

15Hiatoa’e ty anjomba’e

fe tsy hahafijadoñe;

vontitire’e fe tsy leo’e.

16Maindoñindoñe re añatrefa’ i àndroy andrevaha’ o tsampa’eo i golobo’ey,

17vandindire’ o vaha’eo ty votrim-bato, i traño-vatoo nitsifira’ iareoy.

18Ie ombotañe amy toe’ey, le ho lañe’e, ami’ty hoe,

Mbe lia tsy nahatrea azo iraho.

19Eka, Izay ty haeha’ i lia’ey,

mbe hitiry amo debokeo ka ty ila’e.

20Oniño te tsy ho farien’ Añahare ty vañoñe vaho tsy ho tohaña’e

o lo-tserekeo.

21Mbe ho lifore’e fiankahafañe ty falie’o naho o fivimbi’oo am-pazake.

22Ho saroñen-kasalarañe

ze malaiñe azo,

ho modo ty kivoho’ o tsivokatseo.