Iobe 4

1Le hoe ty natoi’ i Elifaze nte-Temane :

2Hampihivivioke azo hao

ty fimanea’ay rehak’ ama’o?

fa Ia ty maha-lie-batañe tsy hivolañe?

3Ingo te maro ty nanare’o,

fa nampaozare’o ty fitañe mavozo.

4Fiatoa’ o mitsikapio o saontsi’oo;

nampifatrare’o o ongotse mikoletrao;

5F’ie nizò azo henaneo,

ihe ka ty midazidazìtse; nioza ama’o, le minevenevetse;

6Tsy o havañona’oo hao ty fatokisa’o

vaho fitamà’o ty fahitin-dala’o?

7Ehe, tiahio hey:

Ia ty nikoromake te nalio-tahiñe?

Aia ty vañoñe naitoeñe?

8Aa naho o nitreakoo:

hambañe ty tatahe’ ty mpitraba-karatiañe,

naho ty mpitongy kilily.

9Ie mihomak’ ami’ty kofòn’ Añahare,

mikoromak’ ami’ty

fiforoaham-pifombo’e.

10Mitromoro ty liona

mireñetse ty liona romotse,

fe poñafeñe o nifem-parasy tora’eo,

11Mate ty liona-lahi’e te po-tsindroke,

mibarakaike ty anan-diona rene’e,

12Nasese amako añ’etake ty volañe,

nitsepahen-tsòfiko ty nitangongoe’e.

13Nitsakoreñe añ’aroñaron-kaleñe,

ie lampon-drotse ondatio,

14Niazo ty anifan-draho, nirevendreveñe, nampititititihe’e o taolako iabio.

15Nihelañe añatrefan-tareheko eo

ty angatse,

niriñariña o volon-tsandrikoo.

16Nijohan-dre,

fe tsy nirendreko ty vinta’e;

nitroatse aolo’ o masokoo ty vente’e,

nianjiñe, le inao ty fiarañanañañe

nanao ty hoe :

17Ho to añatrefan’ Añahare hao

t’i raolombelo?

halio te amy Namboatse azey hao ondatio?

18Heheke ndra o mpitoro’eo tsy atokisa’e,

mbore anisia’e lilatse o anjeli’eo,

19Àntsake o mpimoneñe an-traño taneo,

O faha’eo an-debok’ ao, ie ho pìneke aolo’ ty fizara!

20Ie demok’ añivo’ ty manjirik’andro naho ty haleñe;

modo kitro-katroke tsy ihaoñañe.

21Tsy nombotañe an-tro’e ao

hao o talin-kivoho’eo?

Ie mihomak’ avao, tsy aman-kilala!