Iobe 39

1Fohi’o hao te ombia ty faneraha’

o ose-lìm-bohitseo?

Ambena’o hao ty fitsongoa’ i fanalokey?

2Lefe’o iaheñe hao o volañe itohera’ iareoo? Rendre’o hao

ty andro faneraha’ iareo?

3Mivokoke iereo, hampipoke anake, hampigadoñe o fitsongoa’eo.

4Mihagañe o ana’eo,

mitombo an-kivoke ey;

ie mionjom-beo, tsy himpoly ka.

5Ia ty nañirake ty borìke ly hidada?

Ia ty nampibalake

ty rohi’ i borìke malisay?

6Nanoeko ho kiboho’e ty fatram-bey

naho ho fimoneña’e ty tane sira.

7Tsambolitio’e

ty fivalitsikotaha’ o rovao,

tsy rei’e ty fikoraha’ i mpiroakey.

8Tsikarahe’e amo vohitseo ty ho fihinana’e vaho tsoetsoehe’e ze hene atao antsetra.

9Hiantofa’ ty ndrimo hao

ty hitoroñe azo?

hialeña’e hao ty an-jolo’o ao?

10Lefe’o hao ty hamahotse i ndrimoy

aman-tàly am-bokavoka eo,

hiava o vavahalio am-pañorihañe azo?

11Hatokisa’o hao,

ty harà’elahin-kaozara’ey?

Hado’o ho aze hao o fitoloña’oo?

12Hiantofa’o hao te hampoli’e

o mahakama’oo,

te hatonto’e hirik’ am-pamofohañe ey?

13Mihepakepak’ an-kafalea’e o elam-boron-tsatrañeo,

ndra te matify o volon’ela’eo,

14Fa apo’e an-tane eo o atoli’eo,

ampamana’e i debokey?

15Amoea’e t’ie mete ho demohem-pandia,

hera ho lialiàm-bibi-ly.

16Ampisoañe’e o ana’eo, hoe t’ie tsy aze;

aa ndra te tsy vente’e o fitoloña’eo

tsy ahoa’e;

17Toe tsy natolon’Añahare hihitse,

vaho tsy nandivà’e hilala.

18Ie mitroatse hitoabora’e le tohafa’e

ty soavala reke-piningitse.

19Tinolo’o ozatse hao ty soavala?

Sinaro’o fineveneverañe hao

ty an-kàto’e ao?

20Ihe hao ty nampitsindrèko aze

hoe valala?

Mampañeveñe ty engem-pikofoha’e.

21Jaote’e ty am-bavatane,

irebeha’e i haozara’ey;

mionjomb’eo re hijoñe

mb’an-kotakotake.

22Iankahafa’e ty tahotse, tsy hemban-dre;

tsy iambohoa’e ty fibara.

23Mikantsakantsàñe ama’e

ty trañom-pale’e

i lefoñe mitsopelatsey,

naho i ana-defoñey.

24Abotse’e an-trotrofiake ty tane

naho an-doroloro;

tsy ampitsangane’ ty fivolan’ antsivay.

25Ndra mbia’mbia mipopò i antsivay

le hoe ty kofò’e: Hirity!

Antsoñe’e añe i hotakotakey, ty fihotrohotro’ o mpifeheo,

vaho i fikorahan’ aliy.

26Ami’ty hihi’o hao ty itiliña’

i tsimalahoy,

ty amelara’e mañatimo o ela’eo?

27Ami’ty taro’o hao ty fañambonea’

ty vantio

hañamboara’e traño andigiligy eñe?

28Himoneña’e an-kereretsak’ ey;

hañialoa’e an-tseram-bato tsy takatse eñe.

29Talakese’e boak’ao ty tsindro’e;

mahatrea lavitse o maso’eo.

30Misike lio o ana’e tora’eo;

Amy vinonoy ty toe’e.