Iobe 37

1Inao ka, ty mampinevenevetse

ty troko

ty mampitsamboañe aze an-toe’e.

2Tsatsiho ty fipoñam-piarañanaña’e,

naho i hotroke miakatse am-palie’ey.

3Hahà’e ambanen-kaliforan-dikerañe eo naho i hela’ey pak’añ’olo-ty tane toy.

4Mandimbe aze ty fitroñam-peo,

mangotrok’ amy fiarañanañan’ enge’ey vaho tsy ho kalaña’e i helatsey t’ie janjiñeñe

i fiarañanaña’ey.

5Halatsàñe ty fangotrohan’ Añahare

i fiarañanaña’ey;

ra’elahy o fitoloña’eo,

tsy lefen-tika tsikaraheñe.

6Hoe re amy fanalay, Mifiafià an-tane eo; naho amy orañey, Milihira.

7Vihine’e iaby ty fità’ondatio

hahafohina’ ze kila ondaty ty fitoloña’e.

8Mimoak’ an-dakato ao amy zao o bibio,

miampitse am-pipalira’e ao.

9Boak’ atimo ao ty tangololahy,

boak’ avaratse añe i tsintsiñey.

10Ty kofòn’ Añahare ro anoloram-panala,

Ajihe’e ty fibanara’ o ranoo.

11Ampijinie’e halèñe

i rahoñe milodolodoy:

Ampiparaitahe’e mb’eo

o rahom-pihelara’eo.

12Mibalike re, añodiña’ ty fiteha’e,

hanoa’e ze andilia’e

ambone’ o tane fimoneñañeo.

13Ampahavia’e, ke t’ie kobaiñe,

ke ho an-tane’e, he te fiferenaiñañe.

14Inao! ry Iobe, mijohaña vaho haraharao

o fitoloñan’Añahare fanjakao.

15Fohi’o hao ty fampijadoñan’

Añahare iareo?

Ty fampipalipalitsie’e o raho’eo

himilemiletse.

16Fohi’o hao ty fandanjan-drahoñe,

o halatsañe amy Lifo-kilalaio?

17Ihe aman-tsaroñe matrovoke naho

ampitsiñe’ i tiok’atimoy ty tane toy?

18Lefe’o hao, ihe mitraok’ ama’e,

ty mamelatse i likerañey,

an-kagàn-ketsoro natranake.

19Añanaro anay ty ho saontsie’ay;

Fa tsy mahafandahatse

zahay ty amy ieñey.

20Hisaontsiañe hao

te izaho hivolañe?

Ihalalia’ t’indaty hao te hagedrañe.

21Tsy ho isa’e henaneo i hazavàñe mireandreañe an-kalo’ o rahoñeo;

naho tsy ampisavae’ i tioke mihelañey.

22Havolamenañe ty boak’ avaratse añe ;

aman’engeñe maharevendreveñe

t’i Andrianañahare.

23Tsy lefe’ay tsikaraheñe ‘nio i El-Sadai,

Jabahinak’ an’ ozatse,

fe tsy olañe’e ty zaka

naho ty havantañañe vokatse.

24Aa le mañeveñe ama’e ondatio;

leo raike tsy haoñe’e

t’ie manao kante an-troke.