Iobe 22

1Le hoe ty natoi’ i Elifaze nte-Temane:

2Mahasoa an’Andrianañahare hao t’indaty?

mahafitoloñ’aze hao t’ie bey moko?

3Mahafale i El-Sadai hao

t’ie vantañe?

aman-tambe’e hao te

fonire’o tsy aman-kila o sata’oo?

4Ty fañeveña’o ama’e hao

ty añendaha’e azo hizaka’e?

5Tsy mitoabotse hao o tahi’oo?

Tsi-vatse o hakeo’oo!

6Nangala’o tsoake ami’ty tsy

vente’e i rahalahi’oy,

vaho hinoli’o hiboridañe.

7Tsy nanjotsoa’o rano ty taliñiereñe hinoma’e,

vaho nitana’o amy salikoeñey

ty mahakama.

8Tompo’ ty tane toy ty fanalolahy;

vaho mpioneñe ao ty aman-kasy.

9Nampolie’o hara’e o vantotseo,

vaho navitso’o ty taña’ o bode-raeo.

10Toly t’ie arikoboñem-pandrike, naho itsoborean-ka’endrahañe;

11an-kamoromoroñañe tsy hahaisaha’o,

vaho mandipots’azo ty rano bey.

12Tsy andindin-dikerañe ao hao

t’i Andrianañahare?

Isaho ka ty haabo’ o vasiañeo,

t’ie an-tiotiots’ eñe.

13Hoe irehe: Ino ty arofoanan’ Añahare? hahafiranga

o ieñe milodolodoo hao ty fizakà’e?

14Mañibok’ aze o rahoñe mikopokeo

tsy hahavazohoa’e,

vaho an-kivoho’ i likerañey ty fidraidraita’e.

15Horihe’o hao i lalañe haehae

nilià’ ondaty tsereheñeoy?

16O sinintoñe aolo’ ty andro’eo;

ie sinaon-drano-vohitse o faha’eo,

17ie nanao ty hoe aman’ Añahare:

Ihankaño zahay; naho,

Ino ty mete hanoa’ i El-Sadai?

18Mbe natsafe’e hasoa avao

ty anjomba’e.

Fe lavits’ ahy ty famerea’ o tsivokatseo.

19Oni’ o vañoñeo Izay, le fale,

iankahafa’ o malioo añ’ inje,

20[ami’ty hoe]:

Toe naitoeñe o malaiñe anaio,

niforototoe’ ty afo

o vara’ iareoo.

21Aa le mifampilongoa ama’e,

hanintsiña’o, hitotsaha’ ty soa.

22Ehe, rambeso am-palie’e

ty Hake,

vaho ahajao añ’arofo’o ao

o tsara’eo.

23Mimpolia amy El-Sadai

le ho vaoen-drehe,

ampisitaho lavitse

i kiboho’oy ty tsy to.

24Ahajao an-debok’ ao ty vara,

ty volamena’ i Ofire

amo vato an-torahañeo.

25Le i El-Sadai ty ho vara’o,

ie ty volafoty ki’e ama’o,

26vaho hifalea’o t’i El-Sadai,

le hampiandrae’o aman’ Añahare

ty lahara’o.

27Hihalaly ama’e irehe, le hijanjiña’e,

ie havaha’o o nifantà’oo.

28Hisafiry irehe, le ho tafetetse vaho hireandreañe

amo lala’oo ty hazavàñe.

29Naho eo ty areke,

le hanoa’o ty hoe: tsiringèvotse!

ty mirè-batañe ro haha.

30Havotso’e hao ty tsy malio tahiñe,

hañaha azo ty faliom-pità’o.