Iirmeà 46

1Niheo am’Iirmeà, mpitoky ty tsara’ Iehovà ty amo fifeheañeo; 2ty amy Mitsraime, i mpirai-lian-dahin-defo’ i Parò-Neko1 mpanjaka’ i Mitsraimey, ie añolo’ i Saka-Perate2 e Karkemise ao, le ginio’ i Nebokadnetsare mpanjaka’ i Bavele, amy taom-paha-efa’ Iehoiakime ana’ Iosià mpanjaka’ Iehodày.

3Ihentseño ty fañeba

naho ty fikalan-defo,

vaho itotoho i hotakotakey.

4Aombeo laboridy o soavalao,

naho miningira, ry mpiningi-tsoavalao;

mijohaña eo reketse kalan-doha;

fotìo o lefoñeo, aombeo o sarom-bìo.

5Akore t’ie treako hoe

lonjetse naho miamboho?

Finofok’ ambane o fanalolahi’eo,

fa nitriban-day mb’eo,

vaho tsy nitolik’ am-boho,

fa niarikatoha’ ty firevendreveñañe,

hoe t’Iehovà.

6Tsy hahafiorotse ty masìka,

tsy hahafivoratsake ty fanalolahy;

mitsikapy vaho mikorovoke

mb’avaratse añe iereo,

marine i Saka-Peratey.

7Ia ty hambañ’am’Ieore3 mitroatroakey,

manahake o saka misorotombake hanginahina’eo?

8Manahake Ieore t’i Mitsraime

amy fitabatroaha’ o rano’eoy;

ie manao ty hoe:

Hitroatse iraho, hanginahina naho

hampiopo ty tane toy,

toe harotsako i rovay naho

o mpimoneñe ama’eo.

9Mionjona ry soavalao,

mionara ry sareteo;

ampivavaro mb’etoy o fanalolahio,

o nte-Kose naho nte-Pote4

mahafitàm-pikalan-defoñeo,

o nte-Lode5 mahatañe naho

mahafibitsoke faleo.

10Amy te hanañ’ androm-pañondroha’e

t’i Talè Iehovà’ i Màroy,

hamalea’e fate o rafelahi’eo,

hampibotsehañe i fibaray

ampara’ te etsake

naho mamo ami’ty lio’ iareo;

fa manao soroñe t’i Talè,

Iehovà’ i Màroy,

an-tane avaratse, marine’ i Saka-Peratey.

11Mionjona mb’e Gilade6 mb’eo,

mitohà fatevo7

ry anak’ ampela’ i Mitsraimeo;

fonga tsy jefa’e o aoly anoe’oo,

toe tsy eo ty hampijangañe azo.

12Fa jinanji’ o kilakila’ ndatio

ty fisalara’o,

vaho manitsike ty tane toy

ty fikoikoiha’o,

fa nitsikapy amy maozatsey

ty fanalolahy, sindre nihotrake.

13Ty tsara’ Iehovà am’ Iirmeà mpitoky, te hanao akore ty hionjona’ i Nebokadnetsare mpanjaka’ i Bavele mb’an-tane Mitsraime mb’eo handafa aze?

14Tseizo’ areo e Mitsraime ao,

koiho e Migdole,

koiho-lava e Nofe

naho e Tafanese, vaho ano ty hoe:

Mijohaña vaho mihentseña

fa hampibotsek’ añ’ariary azo i fibaray.

15Akore te nafaoke añe o maoza’oo?

Ie tsy nahafitroatse amy te

tinindri’ Iehovà ambane.

16Maro ty tsinikapi’e;

eka songa mifampikorovoke

vaho manao ty hoe :

Miongaha, antao himpoly

mb’am’ondatin-tika mb’eo,

mb’an-tane nahatoly an-tikañe añe,

hienga ty fijoia’ i fibaray.

17Ty hoe ty nikoihe’ iereo añe:

Koràk’ avao t’i Parò

mpanjaka’ i Mitsraime;

Napo’e hihelañe añe i ni-fantañañey.

18Kanao velon-dRaho hoe i Mpanjakay,

Iehovà’ i Màroy ty tahina’e,

Toe hanahak’ i Tabore8 am-bohitsey

naho i Karmele9 añ’olon-driake añe,

Ty higodaña’e mb’etoy.

19O ry anak’ampela mpimoneñe

e Mitsraime ao, mivatia handenà’o

mb’am-pandrohizañe añe,

fa ho tanàn-taolo ty Nofe,

hampangoakoaheñe

tsy ho amam-pimoneñe.

20Kiloa fanjaka t’i Mitsraime

fe boak’ avaratse añe

ty lale-boròñe hamongotse—toe ho avy.

21Manahake ty sarak’ an-jolok’ ao,

o lahin-defo mpikarama añivo’eo,

fa nivalike ka iereo;

niharo nibotatsake,

tsy nahafijohañe,

fa tondroke ty andron-kankà’ iareo,

ty androm-pitilihañe iareo.

22Hoe mereñe ty fikosasaha’e

ie misoroke o lahindefo’eo,

mikovovoke mb’am-pisorohañ’aze

o lahindefoñeo, ie mitoañ’ aze

am-pekoñe hoe mpañatsak’ ala.

23Hinatsa’ iareo i alay, hoe t’Iehovà,

fa tsy lefe volilieñe;

amy t’ie maro te amo valalao,

mitozantozañe.

24Nisalareñe ty anak’ ampela’

i Mitsraime;

fa natolotse am-pità’ ondaty

avaratse añe.

25Hoe t’Iehovà’ i Màroy, t’i Andria­nañahare’ Israrele, Ho liloveko t’i Amone nte-No10 naho i Parò, naho i Mitsraime, rekets’ o ‘ndrahare’eo, naho o mpanjaka’eo; toe i Parò naho ze miato ama’e. 26Hatoloko am-pità’ o mipay ty fiai’eo naho am-pità’ i Nebokadnetsare mpanjaka’ i Bavele naho am-pità’ o mpitoro’eo; ie añe, le ho fimoneñañe indraike re manahake te taolo, hoe t’Iehovà.

27Aa le ko hemban-drehe

ry Iakobe mpitoroko,

naho ko lonjetse ry Israele;

fa ho rombaheko boake tsietoitane añe, naho ty tiri’o

an-tanem-pandrohiza’ iareo;

himpoly t’Iakobe, naho hierañerañe,

le tsy eo ty hañembañe aze ka.

28Ko hemban-drehe ry Iakobe mpitoroko, hoe t’Iehovà,

fa mpiama’o iraho;

ho fonga mongoreko o fifeheañe

nandroahako azoo,

f’ihe tsy ho mongoreko;

ho liloveko an-jaka-to,

fe tsy hapoko tsy ho liloveñe11.