Iirmeà 1

1Ty enta’ Iirmeà1 ana’ i Kilkià2 mpiamo mpisoroñe nte-Anatote3 an-tane’ Beniamìneo4, 2ie nivotraha’ ty tsara’ Iehovà tañ’andro’ Iosià5 ana’ i Amone6, mpanjaka’ Iehodà, amy taom-paha folo-telo-ambi’ i fifehea’ey. 3Niheova’e ka tañ’andro’ Iehoiakime7 ana’ Iosià, mpanjaka’ Iehodà pak’ami’ty fimodoa’ ty taoñe faha folo-raik’ambi’ i Tsidkià8 ana’ Iosià mpanjaka’ Iehodà, ampara’ ty faneseañe Ierosalaime9 an-drohy añe amy volam-paha-limey.

4Aa le niheo amako ty tsara’ Iehovà nanao ty hoe: 5Ihe mbe tsy tsineneko an-trok’ ao le nifàntako; aolo’ ty niboaha’o an-koviñ’ ao le navahako, vaho tinendreko ho mpitoky amo kilakila’ ndatio.

6Le hoe ty nataoko, Ehe Talè ­Iehovà! Izaho tsy mahafivolañe, fa mbe anak’ ajaja. 7Aa hoe t’Iehovà amako: ko manao zao, t’ie Anak’ ajaja; fa ze amantohako azo ty handenà’o le ndra inoñ’ inoñe ty hatoroko azo, ty ho taroñe’o. 8Ko ihembaña’o; fa mpiama’o iraho handrombak’ azo, hoe t’Iehovà.

9Nahiti’ Iehovà amy zao ty fità’e, le nedrè’e ty vavako; vaho nanao ty hoe amako t’Iehovà: Ingo te napoko am-palie’o ao o entakoo;

10Oniño te androany

ty nampijadoñako azo

ambone’ o fifelehañeo naho o fifeheañeo.

Ty hañombotse naho hampigorobañe,

ty hamotsake naho handrotsake;

ty handranjy vaho hambole.

11Mbore nimb’amako ty tsara’ Iehovà nanao ty hoe: O Iirmeà, mahaisake ino v-iheo? le hoe ty asako: Mahatrea ty tsampa-mahabibo. 12Le hoe t’Iehovà amako, Toe nahaonin-drehe; fa jilojiloveko10 o volakoo hahatafeterako aze.

13Niheo amako fañindroe’e ty tsara’ Iehovà, nanao ty hoe: Inoñe o isa’oo? le hoe iraho, Mahatrea valàñe mikokèntrekokèntreñe iraho; le boak’ avaratse ey ty fihilañam-bava’e.

14Aa le hoe t’Iehovà tamako: Ho boroboñafe’ ty hekoheko boak’ avaratse añe amy ze hene ’ndaty an-tane atoy. 15Ingo ho koiheko iaby ze fifokoa’ o fifeheañe avaratseo, hoe t’Iehovà, homb’ atoy, songa hampipoke ty fiambesam-panjaka’e an-dalam-bey fimoahañe am’ Ierosa­laime, naho amy ze fonga kijoly miarikoboñe aze, vaho amy ze hene rova’ Iehodà. 16Aa le ho taroñeko te hizakako ty hatsivokara’ iareo; amy te naforintse’ iareo iraho, naho mañemboke aman’ drahare ila’e, vaho mitalaho amo sata-pità’iareoo avao.

17Ihe arè, mampidiaña vania vaho miavòta, saontsio ze hene amantohako azo; ko ifimpìña’o, tsy mone hampi­tsolofiñeko añatrefa’iereo. 18Hehe te nanoeko rova finatratse irehe, bodam-biñe, naho kijoly torisìke, amo tane iabio, amo mpanjaka’ Iehodao, amo roan­dria’eo, amo mpisoro’eo, vaho am’ ondati’ i taneio. 19Toe hialia’ iereo; fe tsy hahagioke, amy te ama’o iraho, hoe t’Iehovà, hañahako azo.