Iesaià 59

1Toe tsy ­nitomoreñe ty fità’ Iehovà

tsy haharombake,

mbore tsy mavesatse i ravembia’ey,

tsy hahajanjiñe;

2Fe nampisitake anahareo

aman’Añahare’ areo o tahi’ areoo

naho naeta’ o hakeo’ areoo

amy lahara’ey nahareo,

tsy hahajanjiñe.

3Fa vinetan-dio o fità’oo,

naho haratiañe o rambom-pità’oo;

fa nireha-bande o soñi’oo,

vaho miñeoñeon-kalò-tserehañe o lela’oo.

4Tsy eo ty manisý an-kavañonañe,

tsy eo ty mihalaly an-kahiti’e;

miato an-kafoahañe,

naho mivolam-bande,

mampiareñe fikitrofañe iareo,

mampiboloañe haloloañe.

5Ie mañatoly atolim-pañaneñe,

mandrare fararotse;

mate ty mitsopeke o atoli’eo,

vaho ipoñafan-dapetake ze foy.

6Tsy hanoen-tsaroñe o fararo’eo,

vaho tsy ho sikina’ondaty

o tolom-pità’eo;

toe satan-karatiañe ty fifanehafa’ iareo,

am-pità’ iareo ty tolom-piaroteñe.

7Milay mb’an-kaloloañe mb’eo

ty fandia’ iareo,

naho malisa hampiori-dio màliñe;

vetsevetse raty ty fitsakorea’ iareo,

an-dala’ iareo ty fangoakoahañe

naho ty fandrotsahañe.

8Nofi’ iareo ty lalam-pifampilongoañe,

vaho tsy vantañe o oloñolo’ iareoo;

tsy tendreke ­fañanintsiñe ze mizilike ao.

9Toli-ndra lavits’antika ty havantañañe,

vaho tsy mahatratse an-tika ty hatò;

mipay hazavàñe tika,

fe hehe t’ie hamoromoroñañe.

10Tsapatsapaen-tika i rindriñey

manahake te goa,

eka mitsapatsapa hoe tsy amam-pihaino;

mitotohitse an-tsipinde-mena

hoe am-palipalitsieñe;

itika hoe lolo an-toetse maieñe ao.

11Mañaolo hoe dobe tika,

mangololoike hoe deho;

mipay ty vantañe fa tsy eo;

ty fandrombahañe,

fe mitòtse aman-tika.

12Fa ­mitoabotse añatrefa’o eo

o fiolà’aio,

mbore manisý anay o tahi’aio;

toe aolo’ay eo o fandilara’aio,

vaho fohi’ay o ota-fali’aio:

13mandilatse naho mitety Iehovà

miamboho aman’Añahare’ay

tsy mañorike Aze,

mivolam-pamorekekeañe

naho hamengohañe,

mikinia naho mañakatse

entan-dremborake boak’an-troke ao.

14Naolake ami’ty hatò, midisa-voly

naho mijohañe eñe ty havañonañe;

mitsikapy an-­gadagadañe ey ty fahiti’e,

vaho tsy mete mizilik’ ao ty havantañañe1.

15Milesa ty havañonañe,

ze mienga ty haratiañe

manao ty vata’e ho injaheñe;

vazoho’ Iehovà,

le heje’e t’ie po-kavantañañe.

16Nioni’e te tsy eo ty ondaty,

vaho nilatsa t’ie tsy am-pañalañàlañe;

aa le i fità’ey ty nandrombake ho Aze;

i havantaña’ey ty nanozañe Aze.

17Niombea’e ty havañonañe

hoe sarom-by

naho añambone’e eo ty sabakam-pandrombahañe;

nisaroñe lambam-pamaleam-pate

ho fisaro’e, vaho

nisaravy fahimbañañe ho sarimbo.

18Mira amo sata’ eo, ty havaha’e:

Fiforoforoañe amo malaiñe Azeo,

Fañondroke amo rafelahi’eo;

Fañavahañe amo tokonoseo.

19Izay ty añeveña’ o tahandrefañeo

ty tahina’ Iehovà, i enge’ey,

boak’ am-panjirihan’ andro añe;

fa hanao vovòn-tsorotombake

ty hankàñe, hasio’ ty kofò’ Iehovà.

20Le hitotsak’ e Tsione ty mpijebañe2

ho amo mpiamboho fiolàñe

am’ Iakobeo, hoe t’Iehovà.

21Aa naho Izaho, le zao ty fañinako

am’ iereo, hoe t’Iehovà:

Ty Troko ama’o naho

o tsara najoko am-palie’oo,

ro tsy hienga am-palie’o,

ndra am-palie’ o tiri’oo,

ndra am-palie’ o tariran-tiri’oo,

henane zao naho nainai’e tsy modo,

hoe t’Iehovà.