Iesaià 56

1Hoe t’Iehovà: Mifahara ami’ty hatò,

naho ano ty havantañañe;

toe mitotoke mb’eo ty fandrombahako,

vaho ho bentareñe ty havañonako. 2Haha t’indaty manao zao

naho ty ana’ondaty

mivontititse ama’e;

te ambena’e i Sabotsey

tsy hañotà’e faly, vaho

tana’e ty fità’e tsy hanoe’e raty. 3Tsy apo’e hanao ty hoe,

i renetane mpirekets’ am’ Iehovày:

Toe havi’ Iehovà am’ondati’eo iraho;

vaho tsy hado’e hanao ty hoe ty vositse:

Inao! Hatae maike iraho. 4Fa hoe ty nafè’ Iehovà:

O vositse mpitañ’ o Sabatakoo,

naho mijoboñe o mahafale ahikoo,

vaho mifahatse amy fañinakoy: 5Ho tolorako lily

naho tahinañe an-trañoko ao

naho am-po’ o rindrikoo

ambone’ ze atao anadahy

naho anak’ ampela:

hitolorako tahinañe tsy ho modo,

tsy haitoañe nainai’e 6Le o renetane mpirekets’ am’ Iehovà hiatrak’ Aze,

hikoko ty tahina’ Iehovà ho mpitoro’eo,

ze mañambeñe i Sabotsey tsy haniva aze,

vaho mifahatse amy fañinakoy: 7Ie ro hendeseko

mb’amy vohiko miavakey mb’eo,

vaho hampifalèko an-kivohom-

pitalahoako ao;

ho rambeseñe amy kitrelikoy

ty enga’ holora’ iareo

naho o fisoroña’ iareoo;

amy te hatao: Anjombam-pitalahoa’

ze kila ondaty ty kivohoko. 8Hoe t’i Talè, Iehovà,

Mpanontone o naitoañe

amo ana’ Israeleo,

Mbe eo ty havoriko ho ama’e

amo fa natontoko. 9O ry biby an-kivok’ ao,

mb’etoa hampibotseke,

eka ry hene biby añ’ala ao. 10Goa o mpijilo’eo,

Songa tsy aman-kilala;

Sindre amboa bobo tsy maha-hiake;

mañinofy t’ie mibabòfoke, mpitea-roro. 11Eka matity o amboao,

tsy apota’iareo ty atao etsake, toe mpiarak’añondry

tsy mahafohiñe, o retiañe;

songa mitsile mb’an-dala’e mb’eo

sindre mampitombo ty aze avao

pak’ an-tsitso’e. 12Antao, hoe iereo, Hangalake divay,

hampiboboke ty tron-tika an-toake;

le hanahake ty andro toy avao

ty hamaray, fe ampitoaboreñe.