Iesaià 52

1Mivañona, mivañona,

aombeo ty haozara’o ry Tsione;

sikino o saro’o fanjàkao,

ry Ierosalaime, rova miavakeo;

fa tsy himoak’ ama’o ka henane zao

o tsy nisavatseo naho o tsy malioo.

2Ahifikifiho o debokeo;

miongaha, miambesara, r’Ierosalaime;

mibalaha amo taly am-bozo’oo,

ry anak’ ampela’ i Tsione mirohio.

3Hoe t’Iehovà;

Ie naletake tsy amam-bili’e;

vaho tsy drala t’ie hijebañañe.

4Fa hoe t’i Talè, Iehovà:

Nañavelo mb’e Mitsraime mb’eo

heike ondatiko taoloo, nitaveañe añe;

vaho finorekeke’ o nte-Asoreo

tsy aman-dengo’e.

5Aa inoñe arè ty hanoeko atoy,

hoe t’Iehovà, kanao nasese mb’eo

tsy amam-bili’e ondatikoo?

Mangolalaike o mpifele’ iareoo,

hoe t’Iehovà,

vaho nainai’e terateraeñe

ty añarako1, toe lomoñandro.

6Aa le hahafohiñe ty añarako ondatikoo;

vaho ho fohi’ iareo amy andro zay,

te Izaho ty manao ty hoe: Intoy iraho.

7Fanjaka amo haboañeo

o fandiam-pañitrike talily soao,

ty mitsey fierañerañañe,

ty mitaroñe entan-tsoa,

ty mikoike fandrombahañe

vaho manao amy Tsione ty hoe:

Mifehe t’i Andrianañahare’o.

8Inao ty mpijilo’ areo! Mampipoña-peo, mitrao-pisaboañe;

fa ho isam-pihaino’ iareo ty fibaliha’ Iehovà mb’e Tsione ao.

9Mipoñafa an-drebeke,

miredoña an-tsabo,

ry tanan-taolo’ Ierosalaime;

fa nañohò ondati’eo t’Iehovà,

jineba’e t’Ierosalaime.

10Hinalo’ Iehovà ty fità’e masiñe

am-pihaino’ o kilakila’ ndatio;

vaho hahaoniñe ty fandrombahan’

Añaharen-tika o añ’olo-ty tane toy iabio.

11Miavota, Miengà, miakara boak’ ao,

ko mitsapa raha maleotse;

miakara boak’ añivo’e ao,

miliova, ry mpinday o harao’ Iehovào.

12Tsy halisa hiavotse nahareo,

naho tsy hivoratsake mb’eo;

amy te hiaolo anahareo t’Iehovà

vaho hivoly anahareo

t’i Andrianañahare’ Israele.

13Ingo, hiraorao i mpitorokoy,

hongaheñe naho honjoneñe

mb’andindiñe añe.

14Manahake te nimaro ty nitoritotse ty ama’o— ie dinemoke i lahara’ey,

hoe tsy ondaty, naho ty fañova’e

hoe tsy ana’ondaty—

15ie henaneo ro hampi­tsekake fifeheañe maro,

mijomohòñe ama’e o mpanjakao;

amy te ho isa’ iareo

o mboe tsy nitalilañeo,

vaho ho oni’ iareo o mboe

tsy jinanji’iareo.