Iesaià 40

1Hohò, Hohò, ondatikoo,

hoe t’i Andrianañahare’ areo.

2Saontsio fañohòañe t’Ierosalaime,

vaho koiho ama’e te fa heneke ty ali’e1;

te jinebañe o hakeo’eo,

amy t’ie nandrambe indroe

am-pitàn’ Añahare

ho vale’ o hene tahi’eo.

3Inao ty fiarañanañañe mikoike :

Anataho lalañe am-patrambey añe t’Iehovà.

Ampimirao lalambey an-dratraratra

añe t’i Andrianañahare.

4Haonjoñe iaby ze atao goledoñe,

naho haketrake iaby o tambohoo

ho vàñeñe ze manongatonga,

naho hampimiraeñe ze migodeogodeoñe;

5le haboake ty enge’ Iehovà, vaho hiharo handrendrek’ aze

ze atao nofotse, izay ty nitsaram-palie’ Iehovà.

6Inao ty fiarañanañañe manao ty hoe: Koiho, le hoe ty natoi’e:

Ino ty ho koiheko?

Ahetse iaby ze atao nofotse,

le hoe voñe an-teteke ao ty hasoa’e.

7Miheatse o ahetseo,

mihintsañe o voñe’eo,

kanao tiofe’ ty kofòn’ Añahare, toe ahetse ondatio.

8Miheatse o ahetseo,

mihintsañe o voñe’eo,

fe mijadoñe nainai’e 2

ty tsaran’ Añaharen-tikañe.

9O ry Tsione mpitaroñe entan-tsoao

mañambonea vohitse abo;

ry Ierosalaime mpanese talily soao

poñafo an-koike ty fiarañanaña’o, aonjono, le ko hembañe;

saontsio ty hoe o rova’ Iehodào :

Ingo t’i Andrianañahare’ areo !

10Hehe, te hitotsak’ an-kaozarañe

t’i Talè Iehovà; hifehe am-pità’e;

Ingo, te ama’e i tambe’ey, añatrefa’e o vale-soa’eo.

11Manahake ty mpiarake

miandrazañe i mpirai-lia’ey naho

manontontoñe o vik’añondri’eo am-pità’e

ie otroñe’e añ’araña’e eo, vaho manehak’ ty mampinono mora mb’eo.

12Ia ty nanovy o ranoo an-dela-pità’e,

naho nanjehe i likerañey an-kiho’e,

naho nañiake ty debo’ ty tane toy

am-pañaranañe,

naho nandanja o vohitseo

am-pandanjàñe,

vaho o tambohoo am-balantsy?

13Ia ty nanoro i Arofo’ Iehovà,

he ia ty mpañana’e mañòk’ aze?

14Ia ty niharoa’e safiry,

ia ty nampahafohiñe aze,

ia ty nanoro aze i lalam-bantañey,

naho nampandrendreke aze ty hilala

vaho nañòke aze i oloñolon-kihitsey?

15Toe tsopake an-tsajoa ao

ze kilakila ondaty,

iaheñe hoe deboke

am-pingam-balantsy,

vaho lanjaeñe hoe lemboke o tokonoseo.

16Tsy ampe horoañe ty Lebanone,

tsy mahaenen-­kisoroñañe o bibi’eo.

17Hoe hakoahañe añatrefa’e

o fifeheañ’ iabio, volilien-ko tsy vente’e, ie ambane’ ty hatao kapaike.

18Hirinkiriñe’o ama’ ia arè

t’i Andrianañahare?

vintan’ inoñe ty hampanahafe’o ama’e?

19Hera i saren-draha natrana’ i mpitseney,

naho nipakora’ i mpanefe-volamenay

volamena,

vaho nandranjia’ i mpanefe-volafotiy

silisily volafoty?

20Le eo ty rarake tsy mahalefe enga,

joboñe’e ty hatae tsy ho momoke;

paiae’e ty mpandranjy mahimbañe handranjy ­saren-draha tsy hitroetroe.

21Tsy fohi’o hao? Tsy jinanji’o hao? Tsy natalily ama’o am-pifotora’e añe hao?

Tsy nirendre’o hao

o manànta’ ty tane toio?

22Ie ty miambesatse ambone’ ty

fibontolia’ ty tane toy,

o mpimone’eo ro manahake kijeja;

Ie ty mandamake o likerañeo

hoe lamba fañefetse,

vaho mamelatse iereo

hoe kivohom-pañialoañe.

23Ie ty mamotsake roandriañe ho hakoahañe, naho ampinjarie’e ho tsy vente’e o mpizaka’ ty tane toio.

24Ie vaho nitongisañe,

aniany te nararake;

le namahatse an-tane ao

o taho’eo;

vaho miheatse t’ie tiofe’e,

endese’ o tangololahio añe

hoe ahe-maike.

25Aa le hampanahafe’ areo ama’ ia

te Izaho ro hambañe ama’e?

Hoe i Masiñey.

26Ampiandrandrao mb’añ’abo ey o fihaino’oo, mahaisaha: ia ty namboatse iareo?

I mañakatse ty havasiaña’ iareo

ami’ty ia’ey,

hene kanjie’e amy tahina’ey,

naho amy hara’elahin-kaozara’ey

vaho am-panjofahan-kafatrara’e,

leo raike tsy mikipe.

27Ino ty atao’o ty hoe, O Iakobe,

naho saontsie’o ty hoe: Ry Israele,

Mietake am’ Iehovà ty liako,

tsy ahoan’ Añahareko o zokoo.

28Mboe tsy fohi’o hao?

Tsy jinanji’o hao te tsy mitoirañe, tsy mokotse

t’i Andrianañahare nainai’e,

Iehovà Andrianamboatse o olon-taneo?

Tsy taka-tsikaraheñe o hilala’eo.

29Ampaozare’e o midazidazìtseo;

vaho hafatrare’e o tsy maozatseo.

30Ndra te toirañe

naho màmake o ajalahio,

vaho mikoletra ty fanalolahy;

31Ho vaoen-kaozarañe o mahaliñe Iehovào;

hionjoñe amañ’elatse hoe vantio;

hilay fa tsy ho vozake,

hinokitse fa tsy ho toirañe.