Iesaià 26:3

1Amy andro zay le ho takasieñe

e Iehodà ao ty sabo toy:

Manan-drova maozatse tika;

tinendre’e ho fandrombahañe

o kijoly naho fikalañañeo.

2Sokafo o lalam-beio,

himoaha’ i fifeheañe vantañe

mpitàm-patokisañey.

3Hambena’o am-pierañerañan-to,

ze amam-pitsakoreañe mifahatse ama’o,

amy t’ie miato ama’o.

4Iatò nainai’e t’Iehovà,

amy te lamilamy tsy mb’ia ho modo t’Iehovà, Ià.

5Fa nakapotra’e

o mpimoneñe an-kaboañeo,

linama’e ambane’ i rova miligiligiy,

nilamahe’e an-tane eo,

eka, mb’an-deboke ao.

6Ho lian-tomboke,

ty fandia’ o mpisotrio,

ty fidraidraita’ o boròkao.

7Lalañe mira ho amo vañoñeo izay

ihe, ry Andindimoneñe,

ro mañajary ty lala’ o vantañeo.

8Toe an-dala’ o fizaka’oo

ry Iehovà, ty nitamà’ay Azo;

i tahina’oy naho ty fitiahiañe Azo

ro fisalalàn’arofo’ay.

9Nirie’ ty fiaiko irehe te haleñe;

eka, nitsoek’azo an-troko ato;

amy te, ie ifetsaha’ o fizaka’oo ty tane toy,

le hioke havantañañe ondatio.

10Ndra te isoheñe o lo tserekeo,

tsy ho hai’e o havañonañeo;

fa hikitro-karatiañe

an-tanen-kavantañañe ao,

vaho tsy ho oni’e ty volonahe’ Iehovà.

11Mionjoñe añ’abo ey ty fità’o,

ry Iehovà, f’ie tsy isa’ iareo;

zoe’ iareo an-kasalarañe

ty fahimbaña’o am’ ondatio;

eka, ho forototoen-afo o rafelahi’oo.

12Ry Iehovà,

toloro fierañerañan-jahay;

fa toe Ihe ro nanao

ze hene fitoloña’ay.

13Ry Iehovà Andrianañahare’ay,

fa nifehèn-drotompo ila’ te ama’o zahay,

f’Ihe avao ty toñone’ay tahinañe.

14Tsy ho veloñe o mateo,

tsy hitroatse o loloo;

izay ty namara’o naho nandrotsaha’o iareo

vaho fonga nimodoe’o

ty fitiahiañe iareo.

15Nonjoneñe amo kilakila ondatio irehe,

ry Iehovà,

eka ­nitoabotse amo kila taneo;

iasiañe pak’ añ’olotse tsietoimone’

ty tane toy añe.

16Ry Iehovà, ie niampoheke

te nipaia’ iareo Azo,

ampianjiñeñe ty nampi­doandoaña’ iareo

halaly ama’o ty amy fandilova’o iareoy.

17Manahake ty rakemba mitsongo,

ie mitotoke ty hisamaha’e,

ie manaintaiñe vaho mikoaike

amo fitsongoa’eo;

hoe izay zahay ry Iehovà tañ’atrefa’o eo.

18Toe nivesatse zahay,

nangotsokotsoke,

fe hoe tioke avao ty naboloa’ay;

tsy nañeneke ­famotsorañe amy taney;

mbore tsy nahatoly ondaty ho

mpimone’ ty tane toy.

19Ho veloñe o nivetrake ama’oo,

hitroatse i sandriko nihomakey,

mivañona naho misaboa

ry mpitoboke an-deboke ao,

fa zono maraindray o zono’oo,

vaho haboloa’ i taney o niloloo.

20Antao ry ondatiko,

mihovà añ’anjomba’o ao,

arindrino o lalañe amboho’oo

mietaha hey ampara’ te heneke

i fifomboañey.

21Heheke! miakatse i toe’ey t’Iehovà

handilo o mpimoneñ’ an-tane atoio

ty amo hakeo’eo;

haboa’ i taney ty lio niorike ama’e,

vaho tsy ho lembefa’e ka o vinono’eo.