Iesaià 18

1Hankàñe, ty tane aman’elatse

miñiñiñìñe, alafe’ o toraha’ i Koseo1;

2Ie mampañitrike sorotà mb’an-driake,

an-dakam-binda lava

ambone’ o ranoo!

Dàñe ry mpihitrike, masikà,

mb’ an-tane’ ondaty abo naho

aman-kolitse mendoo; ondaty

mampangebahebake ty ao naho ty añe;

ondaty gañe vaho mandialia,

i tane’ iareo zarazaraen-torahañey.

3Ry hene mpimoneñe ami’ty voatse toio,

ry mpitoboke an-tane ao,

ie mitroatse an-kaboa’ o vohitseo

ty viloñe, le mahaisaha;

naho mipopò i antsivay, mijanjiña.

4Fa hoe ty nafè’ Iehovà amako:

hitàn-kahendrean-dRaho,

vaho hijilojilo boak’am-

pimoneñako atoy,

hoe hatrevohan-tsingilingilieñe

an-tariñandroke,

manahake raho-mika

an-katrovoham-pitatahañe,

5aolo’ i fitatahañey, ie fa nihintsam-boñe,

ie mihamatoe i valoboke makiray,

le ho hitsikitsifem-pibira

miporengotse o singa’eo,

handrantsañe o tsampa’e mandrevakeo.

6Harongoñe eo iereo ho a o

voro-pitsindroke am-bohitseo,

naho ho a o bibin-kivokeo;

le ho ama’e o voro-pitsindrokeo

naho asara, vaho hiasotry ama’e ze hene bibi’ ty tane toy.

7Ie amy andro zay, hanese ravoravo

am’ Iehovà’ i Màroy ondaty abo

naho aman-kolitse mendoo,

ondaty mampangebahebake

ao naho añeo;

foko gañe vaho mandialia,

an-tane zarazaraen-torahañe;

mb’an-toen-tahina’ Iehovà i Màroy:

mb’ambohi-Tsione mb’eo.