Hosèa 7

1Ie ho nanàha Israele iraho,

le niafa-takoñe ty hakeo’ i Efraime,

naho ty halò-tsere’ i Somerone1;

fa nitolom-pamañahiañe;

mimoak’ ao ty mpikizo

vaho mitavañe alafe eo

ty malaso mpifañosoñe.

2Toe tsy tsakoré’ iareo añ’arofo ao

te hene tiahiko ty halò-tsere’ iareo;

miarikoboñe iareo ty sata’ iareo,

aolo’ ty tareheko eo.

3Ampifalea’ iareo i mpanjakay

amo sata-rati’ iareoo,

naho o roandriañeo amo fandañira’eo.

4Fonga mpañarapilo

manahake ty toñake finana’ i mpanoñakey

ie tsy nasoro’e sikal’ami’ty fibokobokoan-kòba ampara’ ty fiboenara’e.

5Tañ’ andro’ i mpanjakan-tikañey,

nisilofe’ ty hamaen-divay o roandriañeo,

ie nañoho-pitañe amo mpandrabioñeo.

6Fa hinalankañe hoe toñake

ty arofo’ iareo,

ie mirekak’ avao te haleñe ie mirotse avao i mpanoñakey;

le ie maraindray, miforehetse

hoe afo milebaleba.

7Manao hamaen-toñake iaby,

fa finorototo’ iareo o mpizaka’eo;

le fonga nihotrake o mpanjaka’eo;

leo raike tsy mikanjy ahy.

8Efraime: mpitraok’ amo ambahinio,

hoe mokary tsy navalike t’i Efraime.

9Nabotse’ o ambahinio ty haozara’e,

fe amoea’e;

eka etia naho atia ama’e ty maròy foty,

fe tsy rendre’e.

10Mitalily an-dahara’e ty fisengea’ Israele,

fe mboe tsy nimpoly am’ Iehovà

Andrianañahare’e,

vaho mb’e mboe tsy mipay Aze iereo

amy hoe zay iaby.

11Manahake deho minè t’i Efraime,

tsy mahafohiñe;

koihe’ iereo ty Mitsraime

vaho mionjomb’e Asore mb’eo.

12Handafihako harato iereo te mañavelo;

ho tariheko mañambane

manahake o voron-dikerañeo;

ho liloveko iereo amy

nitalilieñe amy fivori’ iareoy.

13Hankàñe ama’e! fa nandripàke amako;

firotsahañe am’ iereo fa niola amako!

Ho nijebañeko

f’ie nifosa vande.

14Mboe tsy nitoreo amako

boak’añ’arofo iereo,

ndra t’ie mangolalaik’ am-pandreañ’ao;

nifanontoñe ty amy ampembay

naho i divay vaoy,

fe iambohoa’ iareo iraho.

15Ndra t’ie naòko, naho

nampifatrareko o sira’ iareoo,

mbe ikinia’ iareo haratiañe avao.

16Nibalike iereo, fe tsy mañambone

hoe fale am-pañahy;

ho tsingoroem-pibara o roandria’eo

ami’ty firengevoham-pamele’ iareo,

izay ty ho fandrambioñañe

iareo an-tane Mitsraime añe.