Hosèa 11

1Ie mbe ni-ajaja t’Israele, le nikokoako vaho tinokako hiakats’ i Mitsraime i ana-dahikoy.

2Ie nikanjieko iereo

àntsake te nihànkañe,

nisoroñe amo Baaleo, vaho

nañembok’ amo samposampoo.

3Izaho ty nañoke i Efraime hitekeñe,

rinambeko an-tañañe,

fe tsy napota’iereo te

izaho ty nampijangañe.

4Tinariko an-tali’ondaty,

am-bahem-pikokoañe,

le nanahake ty mpañaka-joka

an-kàto’ iareo raho

vaho finahako mora.

5Apoho himpoly mb’an-tane Mitsraime re,

naho ho mpanjaka’e t’i Asore,

amy t’ie mifoneñe tsy himpoly amako.

6Hininininike amo rova’eo i fibaray,

handrotsake ty sakan-dala’e,

naho hampibotseke, ty amy fikililia’iareo.

7Imanea’ ondatikoo ty hiola amako,

ndra t’ie mikaike mb’ añ’Abo-Tia,

leo raike tsy mañonjoñ’ Aze.

8Akore ty hampipohako azo, ry Efraime?

Akore ty hanolorako azo, ry Israele?

Akore te hampanahafeko

amy Admà1 ?

ndra t’ie hanoeñe hoe Tsibiìme2?

mikoretse ty an-troko ao,

naho hene niviañeñe o fiferenaiñakoo.

9Tsy hafetsako ty hasiahan-kaviñerako,

tsy hibalike mb’amy Efraime handrotsake;

amy te Andrianañahare iraho,

fa tsy ondaty;

t’i Masiñe añivo’ areo ao;

tsy ho pok’eo an-kabosehañe iraho.

10Hañavelo am-pañorihañe Iehovà iereo;

hitroñe manahake o lionao re;

aa ie mitromoroñe,

le hititititike boak’ ahandrefañ’añe

ty ana’dahy maro.

11Hanahake o voroñeo

ty hiborofota’ iareo

boake Mitsraime añe,

naho hoe deho hirik’ an-tane Asore añe;

ie hapoko añ’anjomba’ iareo ao,

hoe t’Iehovà.