Hebreo 8

Mpañalañalañe ami’ty Fañina Soa

1Aa naho boreñe i nitaroñeñe rezay: Inao ty tali’e: Aman-tika i Mpisorom-bey zay, i nampiambesareñe an-kavanam-piambesa’ i Andindimoneñe andikerañe añey, 2mitoroñe amy efetse masiñey naho ami’ty kivoho to naore’ i Talè fa tsy ondaty. 3Toe songa tinendre hañenga banabana naho soroñe o mpisorom-beio; aa le tsy mahay tsy amam-pañenga ka itoy. 4Mbore, ie tan-tane atoy, tsy ho nimpisoroñe, amy te mbe eo ty mpisoroñe maro mañenga banabana ty amy Hàke, 5mitsikombe naho manalinjo o andindìñeo; toe nihatahataeñe t’i Mosè, ie ho nañoreñe i kivohoy, ami’ty hoe:

Inao, hoe re, te hene ampanahafe’o amy sare natoro azo am-bohitsey.1

6Fe nahazo fitoroñañe fanjàka te amy zay re henaneo amy te ie ty mpañalañalam-pañina soa2, mifototse am-pitamàñe soa te ama’e. 7Aa naho tsy nanan-kila i fañina valoha’ey, le tsy nipaiaeñe ty faharoe. 8Fa ninjè’e ami’ty hoe:

Inao, ho tondroke ty andro, hoe t’Iehovà,

te hilaharako fañina vao

amy anjomba’ Israeley

naho amy anjomba’ i Joday—

9tsy manahake i fañina nanoeko

aman-droae’ iareo

amy andro nitanatanàko

vaho niaolòako iareo

niakatse an-tane Mitsraimeiy;

amy t’ie tsy nahatañe i fañinakoy,

le niambohoako, hoe t’Iehovà.

10Zao ka ty fañina horizako

ami’ty anjomba’ Israele,

naho fa añe i andro rey,

hoe t’Iehovà.

Hajoko an-tro’ iareo ao i Hà-koy

naho ho sokireko añ’arofo’ iareo ao:

le ho Andrianañahare’ iareo iraho,

vaho h’ondatiko iereo.

11Le tsy songa hifañoke o mpitrao-pimoneñeo, naho tsy sindre hanao aman-drahalahi’e,

ty hoe: Mahafohìna Iehovà,

amy te fonga hahafohiñe ahy,

ty kede pak’ an-joke’e.

12Fa ho ferenaiñako ty hatsivokara’iareo,

vaho tsy ho tiahiko ka o tahi’ iareoo.3

13Ie nanao ty hoe: Vaoeñe, le fa nampiantere’e i taoloy, le fa himosaoñe o raha mihamodo naho miha-antetseo.