Hebreo 4

Fitofañe ho a Ondatin’Añahareo

1Antao arè hañeveñe, hera ho zoeñ’ ama’ iaia ama’areo, t’ie nilesa amy fampitamañe mbe añey: ty fizilihañe amy fitofà’ey ao. 2Toe nitaroñeñe aman-tika manahake te tam’ iereo i talili-soay; fe tsy nahasoa iareo i tsara nitaroñeñey, amy t’ie tsy natrao’ o nijanjiñeo fatokisañe. 3Itika miantokeo ro mizilik’ amy fitofàñey, (ty amy tsinara’e ty hoe,

Ie nifantàko an-kabosehañe

t’ie tsy himoak’ amy fitofakoy ao.1)

ndra te nifanehafeñe boak’ am-pifotora’ ty voatse toy o fitoloñañeo2. 4Fa eo ty tsa­raeñe ty amy faha-fitoy ty hoe:

Nitroatse amo hene fitoloña’eo, ami’ty andro faha-fito

t’i Andrianañahare.3

5Le tinovo’e ty hoe:

Tsy himoak’ amy fitofàkoy iereo.4

6Aa kanao mbe hizilike ao ty ila’e, naho nilesa ka tsy nizilik’ ao ty amy fanjeharañey o nitaro­ñeñe valoha’eo, 7le nañoriza’e andro indraike atao Anito amy nampisaontsie’e i Davide haehae atoiy amy tsara’ey ty hoe:

Anito, naho janji’areo ty fiarañanaña’e

ko mampientetse arofo.5

8Aa naho nitolora’ i Josoa fitofàñe, tsy ho nitalilie’e andro ila’e afara. 9Inao, toe mbe eo ho a ondatin’ Añahareo ty fañambenañe Sabotse6; 10amy te mitofa amo fitoloña’eo ty mizilik’ amy Sabotse’ey, hambañe aman’ Añahare amy azey7. 11Antao arè himane fizilik’ amy fitofàñey, tsy mone hikapotrake am-pitsikombeañe i fanjeharañey.

12Toe veloñe naho mahatafetetse o tsaran’ Añahareo, masioñe te amy ze fibara sambelela’e, mitrofake pak’ ami’ty fifamitraña’ ty fañova ami’ty arofo, naho o fangeo amo betro’eo; naho mahatsikarake o fivetsevetse naho safirin’ arofoo, 13vaho tsy eo ty namboareñe ze mietake ama’e; fa kila miborake naho mivendratse am-pihaino’ i hamolily an-tikañey.

i Mpisorom-bey Ra’elahiy

14Aa kanao amam-Pisorom-bey nahafiranga o likerañeo tika, toe Iesoà Anan’ Añahare, le antao hifahatse ami’ty iantofan-tikañe. 15Amy t’ie tsy amam-Pisorombey tsy mahay milèñ’ arofo amo halemèn-tikañeo, ie nizizieñe amy ze he’e manahak’ itika, fe tsy aman-tahiñe. 16Antao arè hahasibeke hitotoke mb’amy fiambesan-kasoay, hiferenaiñañe, naho hitretrezañe an-tsan-kasotriañe.