Hebreo 13

Fitoroñañe Non’ Andrianañahare

1Mitoloña am-pikokoan-dongo. 2Ko ado’ areo ty fampiantrañoañe ambahiny, amy t’ie ro nampiantrañoa’ ty ila’e anjely fe tsy nahafohiñe. 3Tiahio o an-drohio hoe te mindre mirohy ama’e, naho o samporeraheñeo kanao an-tsandriñe ka nahareo. 4Ee te hene hiasy o fanambaliañeo vaho tsy ho leoreñe i tihiy amy te zakaen’ Añahare o mpañarapiloo naho o manao fioloram-palio. 5Le asoao tsy ho an-troke ao ty fikiràñe, mierañeràña amo fanaña’ areoo, ty amy tsara’e ty hoe:

Le lia’e tsy hienga azo raho

vaho tsy haforintseko.1

6Le hahavany hanao ty hoe tika:

I Talè ro mpañimb’ahiko;

tsy ho hemban-draho

ino ty hanoe’ ondaty amako2

7Tiahio o manan-dily ama’areoo, ie nisaontsy ty tsaran’ Añahare ama’ areo, naho ty havokaram-pañaveloa’ iareo vaho tsikombeo ty fatokisa’ iareo. 8Tsy mihotike t’Iesoà Norizañe, ndra omale, ndra androany, ndra nainai’e donia. 9Asoao tsy hampitsilè’ o fañòhañe ankafankafa mañembetseo3. Mahasoa ty arofo te ampaozareñe am-patarihañe fa tsy amo raha kamaeñe, ie tsy nahasoa o nitoloñe ama’eo. 10Aman-kitrely tika tsy anaña’ o mpitoron-kivohoo zo ikamañe. 11Fa oroañe alafe’ i tobey ty vata’ o biby angala’ o mpisorom-beio lio hendese’e amy toetse masiñey ao ty amo hakeoo. 12Toe nijale alafen-dalam-bey ao ka t’Iesoà, hañefera’e ondatio amy lio’ey. 13Antao arè, homb’ama’e, alafe’ i tobey añe, hivave o fañinjeañ’ azeo. 14Tsy aman-drova tsy ho modo atoy tika, fe misalala i hitotsakey. 15Aa le ie abey ty hibanabanàn-tika engan-tsabo nainai’e aman’ Añahare, ty vokam-pivimby4 mibango i tahina’ey. 16Le ko apo’ areo ty fanoan-tsoa, naho ty fifañaoñañe, fa non’ Añahare t’ie banabanaeñe.

17Mivohora amo mpiaolo’ areoo, le iambaneo, fa iereo ro mpañambem-piai’areo hoe ondaty tsy mahay tsy hamolily. Efao abey iereo hitoloñe an-kaehake, fa tsy aman’ anahelo tsy hahasoa anahareo.

18Mihalalia ho anay, fa iantofa’ay te mazava ty tro’ay, toe satri’ay ty hañavelo an-kavañonañe amy ze he’e. 19Aa le onjoneko ama’ areo ty osike hanao izay, soa te hampolieñe ama’ areo masìka iraho.

20I Andrianañaharem-panintsiñañey abey, i nampitroatse i Mpiarak’ añondry ra’elahy boak’an-kavilasiy, amy liom-pañina tsy modo’ Iesoà Talèn-tika, 21ro hampañeneke5 anahareo amy ze hene sata soa hitoroña’areo amo satrie’eo, ie hitoloñe aman-tika6 ze no’e am-pivazohoa’e, añam’ Iesoà Norizañey: aze ty engeñe nainai’e tsy modo. Amena.

22O ry longo, ehe iantofo ty fañisohañe sinokiko bòry toy. 23Fohino te navotsotse t’i Timoty rahalahin-tika; aa ie pok’ atoy aniany, le hindrezako hitilik’ anahareo. 24Salamao iaby o mpifehe’ areoo naho o noro’e iabio. Mañontane anahareo o nte-Italio. 25Hasoa ama’ areo iaby. Amena.