Hebreo 10

Ty Fisoroña’e Indraike avao

1Amy Hake ao ty fanalinjoañe o raha fanjàka ho avio, fe tsy ty vintan-to’ o rahao, ie le lia’e tsy fonireñe an-tsoroñe engaeñe boa-tao-boa-taoñe o mitotoke mb’eoo. 2Naho tsy izay, tsy ho nijihetse hao o fisoroñañeo? amy te tsy ho nioveovèn-tahiñe ka o fa neferañeo. 3Fe amy fisoroñañey ty faniahian-kakeo boa-taoñe, 4fa tsy ‘mbia mahahaha hakeo ty lio’ o baniao naho o mpirai-liao. 5Aa le hoe re te mizilik’ an-tane atoy:

Tsy nipay soroñe naho enga irehe,

fa sandriñe ty añajaria’o ho ahiko;

6Tsy nirei’o tave o enga noroañeo

naho o soron-kakeoo.

7Le hoe iraho:

Intoy iraho, ry Andrianañahare,

nimb’etoan-draho hanao ty satri’o,

fa amy boke-pelekey ty nanokirañe ahy.1

8Ie nanao ty hoe heike: Tsy paia’o o soroñeo naho o banabanao naho o enga oroañeo vaho o engan-kakeoo, toe tsy rei’o tave (ze engaeñe ty amy Hàke)2 9le tinovo’e ty hoe: Intoy! nimb’ etoan-dRaho hanao ty satri’o3. Nasita’e i valoha’ey hampijadoña’e i faharoey; 10ie an-tsatri’e ty nañefetse antika amy nañengàñe indraike mahaheneke ty fañòva’ Iesoà Norizañey.

11Mijohañe eo mitoroñe boak’ andro ze hene mpisoroñe mitolom-pañenga i soroñey avao, ze tsimbia mahahaha hakeo. 12Fa ie ka, naho fa nañenga soroñe raike, le nahaheneke efe-tahiñe ho nainai’e donia, niambesatse am-pitàn-kavanan’ Añahare eo, 13mandiñe, ampara’ te hanoeñe fitongoà-pandia’e o rafelahi’eo4. 14Fa i banabana raikey ty namonira’e ho nainai’e tsy modo o nefera’eo. 15Taroñe’ i Arofo-Masiñey aman-tika ka ty hoe:

16Intoy ty fañina hanoeko am’ iereo

naho modo i andro rezay, hoe t’i Talè;

Hajoko añ’arofo’ iareo ao i Ha-koy

naho ho sokireko

am-pivetsevetse’ iareo ao,

17vaho tsy ho tiahiko ka

o hakeo naho tahi’ iareoo.5

18Ie nafahañe o fandilarañeo, le tsy paiañe ka ty engan-kakeo.

Fikanjiañe Hivontitise

19Ie amy zao, ry longo, kanao maha­sibeke fimoak’ amy toetse loho-masiñey tika amy lio’ Iesoày, 20amy lalañe vao naho veloñe noriza’e ho antikañe misoroke i lamba fañefetsey—toe i fañòva’ey; 21itika amam-Pisoroñe Bey mpifehe i anjomban’ Añaharey, 22le antao hitotok’ aze añ’ arofo mazava, lifo-patokisañe mahafiato, naho namitsezañe ty amo vetsevetse ratio o tron-tikañeo vaho nampandroañe an-drano mikanitsoke6 o sandrin-tikañeo, 23antao hilozohan-tika taroñe i fitaman-tikañey, tsy hitroetroe, (amy te migahiñe ty Nampitama). 24Le antao hifañaoñe naho hifampañosike hikoko vaho hanao sata soa7, 25le tsy hapoke o fivorintikañeo, manahake ty fanoe’ o ila’eo, fe mifañosiha, àn­tsake te oni’ areo mitotoke i andro zay.

Hatahata 4 : Hankàñe te Misitake

26Aa naho mitolom-pandilatse avao tika, ie mahafohiñe ty hatò, le tsy eo ka ty isoroñan-kakeo8, 27te mone fandiñisañe zaka an-karevendreveñañe, naho fisoloborañ’ afo mampitomontoñe o rafelahio9. 28Vonoeñe tsy an-tretrè ty tsy mañaoñe ty Hà’ i Mosè ami’ty valolombeloñe telo ndra roe. 29Lombolombo izay ty fandilovañe mañeva ze mandialia i Anan’ Añaharey ambanem-pandia’e, naho manao ty lio’ i fañina nañefets’ azey ho tsy malio, vaho miteratera i Arofon-kasoay? 30Fohin-tikañe i nanao ty hoe:

Ahy o famaleañeo, izaho ty hañavake

le ty hoe:

Hizaka on10dati’eo t’Iehovà.

31Maharevendreveñe te mijoñe am-pitàn’ Añahare veloñe ao.

32Tiahio o andro taoloo, inahareo nihazavaeñe ro nahafeake fihotakotahan-kaloviloviañe, 33beteke nisambàeñe t’ie nonjirañe naho nampisoañeñe, beteke nireketse amo nanoañe i hoe zaio. 34Amy te niferenaiña’ areo, izaho an-drohy, vaho nahaehak’ anahareo te nikopaham-bara, fa nahafohiñe an-troke t’ie amam-bara fanjàka tsy ho modo an-dindiñe ao. 35Aa le ko farieñe ty fatokisa’ areo, fa bey ty tambe ama’e. 36Imaneo fahaliñisañe, soa t’ie manao o satrin’ Añahareo ro handrambe i nampitamaeñey. 37Amy te

aniany ty hitotsaha’e

le tsy hihenekeneke.

38Ho veloñ’ am-patokisa’e ty vantañe,

F’ie misitake, le tsy ho no’ ty troko.11

39Toe tsy mpiamo mitsilofìñe ho rotsaheñeo tika, fa mpiamo mahafiatoo, hañarovam-piaiñe.