Hebreo 1

Ty Fandikoara’ i Norizañey o Mpitokio

1Haehae izay, nitsara beteke naho an-tsata maro amo roaentikañeo añamo mpitokio t’i Andrianañahare, 2le an-tsa honka’e zao ro nisaontsie’e aman-tika añamy Ana’ey, i tinendre’e handova ze he’ey, ie ty nanoa’e ty voatse toy1; 3Ie ty fireandrea’ i enge’ey naho ty vinta-to’ i fañòva’ey, mpanohañe ze he’e ami’ty haozara’ o tsara’eo, ie nañefetse o hakeon-tikañeo amy fañòva’ey vaho miambesatse am-pitàn-kavana2’ i Andindimoneñe andikerañ’ añey.

Milikoatse o Irakeo i Anakey

4Ie nampilikoareñe an-tiotio’ o anjelio, le nampandovaeñe tahinañe ra’elahy te am’ iareo. 5Fa ia amo anjelio ty nisaontsia’e ndra mb’ia mb’ia ty hoe:

Anako irehe;

anindroany ty nisamahako Azo3

naho ty hoe:

Ho Rae’e iraho, le ho Anako re4?

6Ie ninday ty tañoloñolòña’e ami’ty voatse toy, le hoe ty natovo’e:

Ee te hene hitalaho ama’e

o anjelin’ Añahareo.5

7Aa hoe ty nanoe’e o anjelio:

Anoe’e tioke o anjeli’eo, vaho lelan’ afo o mpitoro’eo.6

8Fe hoe re amy Anakey:

Nainai’e donia ry Andrianañahare ty fiambesa’o;

Naho kobain-kavantañañe

ty kobaim-pifehea’o.

9Fa nikokoa’o ty havantañañe

naho nalaiñe ty tsy fañambenan-Kake;

Aa le norizen’ Añahare,

Andrianañahare’o irehe

an-tavon-kaehake ambone’ o rañe’oo,7

10naho :

Ihe ry Talè, tam-pifotorañe añe ro nañoreñe o mananta’ ty tane toio naho satam-pità’o o likerañeo.

11Ho momoke iereo, fe nainai’e eo irehe;

fonga hihamodo hoe saroñe iereo;

12le hambañe ami’ty sarimbo

ty hañoronkoroña’o iareo,

eka, hoe sikiñe ty handimbezañe iareo.

F’ihe tsy mihotike,

naho tsy higadoñe o tao’oo.8

13Le ia amo anjelio ndra mb’ia mb’ia ty nanoa’e ty hoe:

Mitoboha an-tañan-kavanako etoa

ampara’ te anoeko fitongoàm-pandia’oo rafelahi’oo.9?

14Aa vaho tsy songa arofo mitoroñe hao iereo, nahitrike hitoroñe o handova fandrombahañeo?