Kabakòke 1

1Ty entañe nioni’ i Kabakòke1 mpitoky. 2O ry Iehovà, pak’ombia

ty hitoreovako, Ihe tsy mijanjiñeo?

naho ipoñafako feo, ami’ty hoe: Varata! Tsy rombahe’o!

3Ino ty ampahaisaha’o ahy

o tsy fanjofahañeo,

naho ampandrendreha’o ty

halonjerañe, naho ty harotsahañe,

vaho ty halò-tserehañe aoloko ey?

eo ka o mpiolao naho o mpandietseo.

4Aa le repake t’i Hake,

vaho tsy miboake ho vantañe o zakao;

fa arikoboña’ o tsivokatseo o vañoñeo,

aa le zaka vìlañe avao ty mandeha.

5Sambao o kilakila’ ondatio,

le maharendreha naho mañaraharà,

Ilatsao fa hanoeñe amo andro’ areoo

ty fitoloñañe tsy hiantofa’ areo,

ndra t’ie italilañe.

6Inao! te hampitroareko o nte-Kasdìo,

i fifeheañe mafaitse naho malìsay,

o hangovovoke hitsaha’e

i tane bey heneheneio

hitavana’e o akiba tsy a iareoo.

7Ie mampangebahebake naho

mampirevendreveñe;

miboak’ am-bata’e ty hionjona’

ty zaka naho ty enge’e.

8Masika te amo farasio o soavala’eo,

ie maola te amo amboa-hako

an-kaleñeo,

mitsapiotsapioke o mpiningitseo,

boake tsietoitane añe o mpiningi’eo;

miherereake hoe hondria

malisa t’ie hanao revozeake.

9Fonga hihofike mb’eo am-bodongero’e o azeo, miatre-daharañe manahake i tiok’ atiñanañey hanontom-pirohy hoe faseñe.

10Ie mpanivetive mpanjaka,

inje’ iareo o roandriañeo,

itohafa’ iareo ze rova fatratse,

ampirampia’ iereo tane le mitavañe.

11Mihelañe hoe tioke ty arofo’iareo,

fa voa hakeo, amy te samposampo’e ty haozara’e.

12Tsy taolo’ ty atao andro hao irehe

ry Iehovà Andrianañahareko masiñe?

tsy ho mongotse zahay.

Ry Iehovà, toe tinendre’o ho zakaeñe re,

Ihe Lamilamy, ro nañory aze ho liloveñe.

13Amam-pihaino mikotritriake irehe,

tsy mañeva azo ty hivazoho haratiañe;

tsy mete mioniñe hatsivokarañe;

akore te metea’o o mañoho-dozao?

Ihe mianjiñe avao, t’ie abotse’ i lo-tserekey t’indaty vantañe te ama’e;

14Ie anoe’o hoe fian-driake ondatio,

hoe raha milalilaly tsy amam-pifehe.

15Fonga tarihe’e am-porengotse,

kozozote’e an-karato,

naho manontoñe an-jarifa,

vaho mirebeke am-pitreñañe,

16Misoroñe amo harato’eo,

naho mañemboke amo jarifa’eo,

amy t’ie ro mahavondrake ty anjara’e,

naho mahatobàke o mahakama’eo.

17Aa ho koahe’e hao o harato’eo?

ho zamane’e nainai’e hao o fifeheañeo

fa tsy hanisa?