Iekezkèle 28

1Niheo amako indraike ty tsara’ Iehovà nanao ty hoe, 2O ana’ondatio, saontsio ty hoe ami’ty roandria’ i Tsore, Hoe ty nafè’ Iehovà Talè:

Amy t’ie nañonjoñe ty tro’o,

nanao ty hoe:

izaho ro ‘ndrahare,

mpiambesatse am-piambesan-

ndrahare eo,

anteñateñan-driak’ ao;

te mone ondaty irehe

fa tsy Andrianañahare,

najado’o ho arofon’añahare ty tro’o;

3toe mahihitse te amy Daniele irehe;

tsy eo ty bisibisike

hahafietaha’ iareo ama’o;

4ami’ty hilala’o naho ami’ty faharendreha’o

ty nanontona’o vara, naho

namoria’o volamena naho volafoty

an-driha’o ao;

5ty haliforan-kihi’o, o fibalibali’oo

ty nampitomboa’o fanaña, vaho

mitoabotse ty tro’o ty amo varao.

6Aa le hoe ty nafè’ Iehovà Talè amy te nampijadoñe’o ho ndrahare ty tro’o:

7Ingo arè te hampihitrifeko

ama’o ty ambahiny,

ondaty maozatse amo kilakila’ ndatio,

le ho tarihe’ iereo

ami’ty hafanjakan-kihi’o

o fibara’eo,

vaho ho tivà’ iareo ty fireandrea’o.

8Hagado’ iareo mb’an-

tsikeokeok’ ao irehe,

hihomak’ ami’ty

fivetraha’ o zinamañe

an-teñateñan-driakeo.

9Aa mboe hatao’o añatrefa’

i mpamono azoy hao ty hoe:

izaho o ndrahare zao?

Ihe ondaty avao,

fa tsy Andrianañahare,

am-pità’ i mañè-doza ama’oy.

10Hikoromak’ ami’ty fivetraha’

o tsy sinavatseo irehe,

am-pitàn-ambahiny;

amy te Izaho ty mitaroñe,

hoe t’Iehovà Talè.

11Niheo amako ty tsara’ Iehovà nanao ty hoe: 12O ana’ondatio, añonjono bekom-pandalàñe ty mpanjaka’ i Tsorey ami’ty hoe:

Hoe t’Iehovà Talè:

Nivolim-pitombon-kafoniran-drehe,

nilifo-kilala,

vaho niginok’ an-katsomerentserañe.

13Te Edene, golobon’Añahare ao irehe,

nisikine ze hene vatosoa;

ty odeme, ty pit’dà, ty diamondra,

ty tarsise, ty sohame, ty iasefè,

ty safira, ty nòfeke, ty barekate;

vaho nitseneañe ama’o am-bolamena

an-tsata’ ty mandolina naho ty soly,

amy andro nañoreñañe azoy.

14Nimpanàkon-drehe

ry kerobe norizañey,

Izaho ty nampijadoñ’ azo

tamy vohi-masin’ Añaharey;

nihelohelo amo vato milebalebao.

15Nitalango an-tsata’o iaby

boak’ ami’ty andro nañoreñañ’ azo,

ampara’ te nitendrek’ ama’o ty hakeo.

16Nahalipo-tiñak’ azo

ty fitoaboram-pibalibali’o,

naho nandilatse irehe;

aa le navokovokoko boak’amy

vohin’Añaharey,

vaho naretsako aman-keloke

amo vato milebalebao irehe

ry kerobe mpanakoñeo.

17Nañonjoñe azo an-tro’o,

ty hamotsotsore’oy,

naniva azo ty hilala’o

ty amy filoeloea’oy;

nafetsako an-tane eo irehe;

napoko añatrefa’ o mpanjakao, haharendreha’ iareo azo.

18Fa nitivae’o i toe’o miavakey

amo tahi’o tsifotofotoo,

amo hakeom-pibalibali’oo;

aa le nañakarako afo boak’am-po’o ao,

ze nahaforototo azo,

tinenoko ho lavenok’ an-tane eo

am-pahaoniña’ ze hene mahaisake.

19Songa nilatsa’ ze nahafohiñe azo

amo kilakila’ndatio;

nivarata irehe vaho tsy ho eo ka.

20Niheo amako ty tsara’ Iehovà nanao ty hoe: 21O ana’ ondatio ampiatrefo mb’e Tsidone ty lahara’o le mitokia ama’e 22ty hoe, Hoe ty nafè’ Iehovà Talè:

Heheke te miatrek’azo iraho ry Tsidone;

le ho rengeñe añivo’o ao iraho;

naho ho fohi’ iareo te Izaho Iehovà,

ie ametsahako zaka,

vaho haveheñe ama’e.

23Hañitrifako angorosy

naho lio amo lala’eo

naho hitsingoritritse añivo’e ao o fereo,

ty asam-pibara miarikoboñe aze,

vaho ho fohi’ iareo te Izaho Iehovà.

24Aa le lia’e tsy ho aman-droi-piteke

i anjomba’ Israeley,

ndra fatike hampinòtse aze

boak’ amo mpiarikoboñe malaiñe azeo;

vaho ho fohi’ iareo

te Izaho Iehovà Talè.

25Hoe ty nafè’ Iehovà Talè: Ie atontoko amo hene nampipara­tsiahako aze añeo ty anjomba’ Israele, naho fa nampiavaheko am-pihaino’ o kilakila’ ndatio 26le hi­mo­neña’ iareo i tane natoloko amy mpitoroko Iakobeiy. Hiaiñañoleñañe iereo naho hañoreñe kivoho naho hañalahala tanem-bahe le himoneñ’ an-kanintsiñe ao, ie fa nametsahako zaka o mpamaoke mañohoke iareo vaho ho fohi’ iareo te Izaho Iehovà Andrianañahare’ iareo.