Efesosy 6:10

Ry Anake: Ko Manjehan-dRoae

1Ry ajajao, mivohora aman-droae’ areo amy Talè ao, fa izay ty hìti’e. 2Miasia an-drae’o naho rene’o—ty lily valoha’e minday fampitamañe, 3soa te ho tahie’e naho ho lava haveloñ’ amy Taney ao.1 4O ry rae, ko bo­sehañe ty anake, fe beizo amy fañohoañe naho famerea’ i Talè.

Mpitoroñe

5O ry ondevoo, mivohora ami’ty mpifehe’ areo amy haondati’ey, le ihembaño naho ititititiho an-tsò-po, manahake t’ie i Norizañey; 6le ko mitoroñe am-pihainom-bei-lomboke, fe hoe ondevo’ i Norizañey, mitoloñe añ’ arofo ze satrin’ Añahare2, 7mitoroña am-pilozohañe hoe amy Talè fa tsy am’ondaty, 8ie fohiñe te ndra iaia manao soa, ro ho valè’ i Talè, ke t’ie ondevo, he midada. 9Ry talèo! ano manahak’ izay iereo; apoho ty fañembàñañe. Tiahio te andindìñe ao t’i Talè’ iareo naho ty azo, ie tsy mirihy.

Aombeo o Fikalañeo

10Hengaha’e, mihaozara amy Talè naho ami’ty hafatrara’ i haozara’ey. 11Aombeo ty fikalañan’ Añahare fonitse, hatreatrè’areo ty famañahia’ i mpañìnjey; 12amy te tsy mifandrapake ami’ty nofotse naho lio tika, fa amo mpifelekeo, amo aman-dilio, amo mpifeleke an-kamoromoroña’ ty voatse toio, vaho amo fañahin-karatiañe añ’aboo. 13Aa le rambeso ze hene fikalan’ Añahare, hahafijohaña’o amy andro ratiy, le ie fonga nanoeñe, mijadoña. 14Mijohaña arè, ie fa nisadia ty hatò3, naho niombe ty fikalañan’ arañan-kahitiañe4, 15vaho nihana ty fihentseñañe i talili-soam-pañanintsiñey5, 16tovo’e, rambeso ty fikalandefom-patokisañe6, hampikipefañe o ana-pale mibela’ i Ratio, 17endeso ka ty sabakam-pandrombahañe7 naho ty fibara’ i Arofoy, toe i saontsin’ Añaharey8, 18vaho nainai’e mihalalia añ’arofo, an-doloke naho halaly iaby. Mijilova am-pigahiñañe naho am-pihalaliañe heneke ho a o fonga noro’eo. 19Mihalalia ho ahy ka, t’ie ho tolorañe ty hahafitaroñe am-palie misokake, hahavany hampandrendreke ty tafatoño’ i talili-soay, 20ie sorotà’e an-drohy; ihalalio te hahasibeke fita­roñe ami’ty fañeva’e.

Figodañañe

21Aa, ty haharendreha’areo o fitoloñakoo naho ty amako, le i Tikiko, rahalahy sarotse naho mpitoroñe migahi’ i Talèy ro hampahafohiñe anahareo ze he’e. 22Izay ty nañitrifako aze mb’ama’ areo añe, hitalilia’e anay naho hañoho o arofo’ areoo.

23Fañanintsiñe amo rolongoo, naho fikokoañe am-patokisañe boak’ aman’ Añahare Rae naho Iesoà Talè Norizañey. 24Hasoa amy ze hene mpikoko i Talèntika Iesoà Norizañey an-koko tsy modo. Amena.