Amose 4

1Janjiño o tsara zao ry añombe’ i Basane1

ambohi’ i Sameroneo,

ie forekeke’ areo o rarakeo,

naho pirite’ areo o poi’eo,

vaho manao amo roandriañeo ty hoe:

Añendeso hinoman-tika. 2Fa nifanta ty amy hamasiña’ey

t’Iehovà, Talè:

Toe ho tsatok’ ama’ areo ty andro

t’ie hasese mb’eo am-porengotse,

ty sehanga’ areo am-bintañe. 3Hipororoak’ amo heba’eo nahareo

songa rakemba hifanoitoy mb’eo,

vaho hahifike mb’e Karmone2 añe

hoe t’Iehovà. 4Mb’e Betele mb’atoy, le mandilara;

mb’e Gilgale3 le ampitombò hakeo;

banabanao o enga’ areoo te maraindray,

ty faha-folo’e añ’andro fahatelo’e; 5naho añengao sorom-pandrengeañe

milaro lalivay4,

le tseizo o banabanan-tsatrin-trokeo,

vaho isengeo,

fa izay ty tea’ areo, ry ana’Israeleo,

hoe t’Iehovà, Talè. 6Fa nitolorako nife malio

amo rova’ areo iabio,

naho tsy fahampeañe mofo

añ’anjomba’ areo,

fe tsy nimpoly amako nahareo,

hoe t’Iehovà. 7Nampihakañeko ama’ areo ty orañe,

te mbe volañe telo añe i fitatahañey,

le nampahaviako orañe ty rova raike

fa tsy nampahaviako ka ty rova raike;

toetse raike ty nahazo orañe,

niforejeje ka i tsy nahavia’ey. 8Aa le nitoha rano hinoma’e mb’ an-drova raike añe ty rova telo ndra roe,

fa tsy nahaeneñe,

mboe tsy nimpoly amako avao

nahareo, hoe t’Iehovà. 9F’ie linafako an-tio-maike

naho an-tromambo;

le nabotse’ ty kijeja

ty hamaroa’ o golobo’ areoo,

naho o tanem-bahe’ areoo,

vaho o voanio’ areoo;

fe tsy nimpoly amako, hoe t’Iehovà. 10Nahitriko ama’ areo ty angorosy

manahake o tan-tane Mitsraime añeo,

zinamako am-pibara o ajalahi’ areoo,

naho tinavako o soavala’ areoo,

nampionjoneko mb’am-pian­tsona’ areo ao ty fitrotròra’e;

fe tsy nimpoly amako, hoe t’Iehovà. 11Finongoko ty ila’e ama’ areo

manahake ty namongoran’Añahare

i Sedome5 naho i Amorà6,

ie nihoe foroha mirekake tsinoake

amy afoy ao;

fe mboe tsy nimpoly amako

hoe t’Iehovà. 12Toly ndra inao ty hanoeko ama’o

ry Israele;

kanao tsy mete tsy hanoeko,

le mihentseña hifañaoñe

aman’ Añahare’o ry Israele. 13Inao, i mpitsene o vohitseo

naho mpamboatse o tiokeoy,

I mampiborake o vetsevetse’eo am’ondatioy.

I mampiboake ty manjirik’andro

ami’ty fimoromoroñe,

I midraidraitse amo toets’ambone’

ty tane toioy;

Iehovà Andrianañahare’ i màroy

ty tahina’e.