Samoele II 22

1Tinaro’ i Davide am’ Iehovà ty onin-tsabo toy amy andro nandrombaha’ Iehovà aze am-pità’ o rafelahi’e iabio naho am-pità’ i Saoley; 2le hoe re:

Lamilamiko t’Iehovà;

ty fitsolohako, naho

ty mpandrombak’ ahy.

3T’i Andrianañahare lamilamiko,

Ie ty fipalirako, ty fikalan-defoko,

ty tsìfam-pandrombahañe ahy,

ty fitalakesañ-aboko,

naho ty fiampirako;

t’i Mpandrombak’ ahy,

Ihe ro mamotsots’ ahy amo hotakotakeo.

4Rengèñe, hoe ty koiko, t’Iehovà,

fa hinaha’e amo rafelahikoo.

5Nandipotse ahy o onjan-kavilasio,

nañoridañe ahy ty fisorotombaha’ i Beliale.

6Mivandibanditse amako

o vahoran-tsikeokeokeo;

miatreatre ahy o fandrim-pihomahañeo.

7Ie niampoheke le nikanjy Iehovà,

eka, kinanjiko t’i Andrianañahareko;

le jinanji’e an-kivoho’e ao ty feoko,

vaho nimoake amo ravembia’eo ty fitoreoko.

8Nanginikinike naho niozoñozoñe ty tane toy

niezeñezeñe o fahan-dikerañeo;

nañondrañe ty amy haviñera’ey.

9Nionjoñe boak’ am-piantsona’e ty hatoeñe;

afo nahaforototo ty hirik’ am-palie’e ao;

foroha mirekake ty boak’ ama’e.

10Nampivokoke o likerañeo re vaho nizotso;

ieñe nimoromoroñe ty ambane fandia’eo.

11Nijoñe ambone kerobe eo re le nitiliñe,

nitalakeseñe ambone’ o elan-tiokeo.

12Nampiarikatohe’e ama’e ty ieñe

manahake t’ie kibohotse, rano mainte

naho rahoñe migobo’ i likerañey.

13Ty fireandrea’ i fiatrefa’ey

ty nahaviañañe vaen’ afo.

14Nangotroke boak’ andikerañe ao t’Iehovà,

tinolo’ i Andindimoneñey fiarañanañañe.

15Nañiririña’e ana-pale, hampibaibay;

helatse, hampitsobore iareo.

16Niboak’ amy zao o goledon-driakeo,

piniopioke o faha’ ty tane toio

ami’ty fañendaha’ Iehovà,

amy fikofò’ o fiantsoña’eoy.

17Nahiti’e boak’ an-dikerañe ao ty fità’e,

rinambe’e iraho, tinari’e

boak’ añ’antara bey ao;

18Rinomba’e amo rafelahiko maozatseo,

amo malaiñ’ahio,

amy t’ie nifatratse te amako.

19Niatreatre ahy iereo añ’andron-kankàñe;

fe nirampiako t’Iehovà.

20Nasese’e mb’an-toetse mangadagadamb’eo

rinomba’e iraho amy te mahafale aze.

21Tinambe’ Iehovà ty havañonako, ty falion-tañako ty nanolora’e ahy.

22Toe nifaharako o lala’ Iehovào, vaho

tsy nitsile an-kelok’ aman’ Añahareko.

23Tañatrefako eo iaby o fepè’eo,

le tsy nisitaheko o fañè’eo.

24Nigahiñe añatrefa’e eo iraho,

vaho nilie-batañe tsy handilatse.

25Aa le tinambe’ Iehovà

i havantañakoy,

ty haliovako am-pihaino’eo.

26O mpitretrèo ro tretreze’o,

vañon-dRehe amo vañoñeo.

27Amo malio arofoo irehe ro ki’e,

fe o mengokeo ro helofe’o.

28Rombahe’o o mpisotrio;

fe amo mpitrotroabokeo o fihaino’oo, hamotsaha’o.

29Ihe ro failoko, ry Iehovà;

hazavae’ Iehovà o faiekoo.

30Ihe ty nañoridañako ty firimboñañe,

i Andrianañaharekoy

ty nanganihako kijoly.

31I Andrianañahare :

vantañe i lala’ey;

niventeseñe ty Tsara’ Iehovà;

fikalan-defoñe re

amy ze hene mitsolok’ ama’e.

32Fa ia t’i Andrianañahare

naho tsy Iehovà?

vaho ia ty Lamilamy

naho tsy i Andrianañaharentikañe?

33T’i Andrianañaharem-pipalirako fatratse;

i mampavantañe i liakoiy;

34Ie manao o tombokoo

ho tombom-panaloke,

vaho mamotrak’ ahy an-kaboañe eo.

35Ie mañòke o tañakoo hialy,

hampibitsohan-tañako ty fale torisìke.

36Fa natolo’o ahy ka

ty fikalan-defom-pandrombahañe;

vaho nampitoabotse ahy o fañisoha’oo.

37Nampangadagadañe’o ty liako;

tsy hititititike o ongokoo.

38Fa hinorìdako o rafelahikoo, vaho narotsako; tsy nimpoly iraho ampara’ te finongoko.

39Nagedrako iereo vaho

trinabotraboko tsy hitroatse;

nikorovok’ ambane tomboko eo.

40Fa nampidiañe’o haozarañe

amy hotakotakey iraho;

fa nampiambanè’o amako

o nitroatse amakoo.

41Natolo’o ahy ka ty hàto’ o rafelahikoo,

haitoako amako o malaiñ’ ahio.

42Nipay iereo, fe tsy amam-pandrombake;

amy Iehovà, f’ie tsy nanoiñe.

43Aa le dinemodemoko ho pilipito’e iereo

manahake ty debo’ ty tane toy,

linialiako hoe fotak’ an-dalañe eo,

toe linialiako ambane.

44Ie rinomba’o am-pikitrohan-drati’ ondatikoo;

nambena’o ho mpiaolo’ o kilakila’ ondatio;

mitoroñe ahy ondaty tsy nahafohiñe ahio.

45Mifimpìñe aoloko eo o anan-drenetaneo;

ie vaho mahajanjiñe ahy,

le mivohotse.

46Mitsilofìñe o anan’ ambahinio,

ie minevenevetse boak’ am-piampira’eo.

47Veloñe t’Iehovà;

andriañeñe i Lamilamikoy;

onjoneñe t’i Andrianañahare,

lamilamim-pandrombahako.

48I Andrianañahare ro mpamale-fate ho ahy,

mamotsake ondatio ho ambaneko.

49I mamotsotse ahy amo rafelahikooy;

eka onjone’o ambone’ o mitroatse amakoo;

haha’o ami’ty ‘ndaty mitrotrofiake.

50Aa le hañandriañe Azo iraho, ry Iehovà,

amo kilakila’ ondatio, vaho

ho bangoeko an-tsabo ty tahina’o.

51Hafatraram-pipaliram-

pandrombahan-dRe

amy mpanjaka’ey;

ferenaiña’e i noriza’ey, i Davide

naho i tiri’ey, nainai’e kitro añ’afe’e