Jaona II 1

1I Zokey,

Ho ami’ty rakemba jinoboñe naho o ana’eo, o kokoako an-katòo; le tsy izaho avao, fa ze hene mahafohiñe ty hatò, 2ie i hatò mimoneñe aman-tikañe vaho ho aman-tikañe nainai’ey. 3Hasoa naho fiferenaiñañe vaho hanintsiñe aman-tika boak’ aman’ Añahare Rae naho hirik’ am’ Iesoà Norizañey, anan-dRae, an-katò naho an-koko. 4Vata’e nahaehak’ ahy te nahatrea o ana’o ila’eo nañavelo ami’ty hatò, do’e amy nandilian-dRae antikañey. 5Mañontane azo iraho, rakemba, tsy t’ie isokirako lily vao, fa i tàman-tika am-baloha’ey, t’ie hifampikoko. 6Zao o fikokoañeo, t’ie mañavelo am-pañambenañe o lili’eo1. Inao i liliy, hañaveloa’ areo amy jinanji’ areo tam-baloha’ey.

7Maro ty mpamañahy fa niboele ami’ty voatse toy ze tsy miantoke te niavy an-tsandriñe t’Iesoà Norizañe. Izay i mpamañahiy, i norizam-bìlañey. 8Mitaoa tsy ho motso ty nifanehafan-tika, soa t’ie handrambe tambe heneke. 9Ndra ia ia milosotse tsy mimoneñe amy fañòha’ i Norizañeiy, le tsy ama’e t’i Andrianañahare2; f’ie mifahatse amy fañòhañey, le ama’e t’i Rae naho i Anakey3. 10Aa ndra ia ia mitilik’ azo tsy minday i fañòhañe zay, ko anoe’o añ’anjomba, vaho ko añontanea’o, 11amy te mpitraok’ amo sata-rati’eo ze mañontane aze.

12Aa ndra te maro ty ho nisokirako, tsy teako t’ie an-taratasy naho rano-mainte, fe salalaeko ty hitilike vaho hifañaoñe ama’o naho hifañatreke hampahaeneñe o haehan-tikañeo. 13Mañontane azo o ana-drahavave’o jinoboñeo.