Korinto II 6

1Aa kanao mifanehake, risihe’ay anahareo ty tsy handrambe ty hasoan’ Añahare vaho hilesa. 2Fa hoe re:

Nitsanoñ’ azo iraho ami’ty andro mete

vaho nañolotse azo

ami’ty androm-pandrombahañe.1

Inao, henaneo ty sa mete; Henanekeo i androm-pandrombahañey.

Ty Hasotria’ i Paoly

3Tsy anoe’ay ty hampitsikapy iaia ama-ndra inoñ’ inoñe, kera ho tiñeañe i fitoroñañey. 4Fe, ventè’ay amy ze he’e t’ie mpitoron’ Añahare: am-pifeahañe mañore, an-kaloviloviañe, an-koheke, am-pamorekekeañe, 5am-pofoheñe, am-porozò ao, am-pandragaragàñe, an-kamokorañe, ie azo ty tsa­reke, le an-kasalikoañe, 6an-kalio-tahiñe, am-paharendrehañe, am-pahaliñisañe, an-tretre amy Arofo Masiñey vaho an-koko tsy voroteñe, 7an-tsara vantañe, an-kaozaran’ Añahare, am-pialian-kavañonañe am-pitàn-kavana naho havia, 8he asiñeñe ke mavoeñe, he fosaeñe ke rengèñe; atao mpamañahy f’ie mahity; 9hoe tsy fohiñe fe arofoanañe; hoe mikenkañe fe hehe t’ie veloñe; nililoveñe fe tsy vinono; 10hoe mandala f’ie nainai’e mandia taroba; hoe rarake fe mampañaleale ty maro; hoe poi’e te mone kila anay.

11O ry nte-Korinto! manoka-palie ama’ areo zahay, mivañavaña o tro’aio. 12Tsy t’ie manebañe anahareo, fe azi’ ty añova’ areo ao. 13Antao hifampira—hoe mirehake aman’ ajaja raho—midañadañà troke ka.

Tsy Iharoan-joka ty tsy Mpiato

14Ko miharo joka amo tsy miatoo. Fa ino ty itraofa’ ty havantañañe ami’ty tsi-fañorihan-Kake? ke ino ty iharoa’ ty zava ami’ty ieñe? 15He akore ty hitraofa’ i Norizañey saontsy amy Beliale? ke ino ty iharoa’ ty mpiato ami’ty tsy miato? 16Aia ty hitraofa’ i anjomban’ Añaharey amo sampon-drahao? toe Anjomban’ Añahare veloñe tika. Fa hoe t’i Andrianañahare:

Himoneñe am’ iareo ao iraho,

naho ho mbeo’mbeo am’ iereo,

le ho Andrianañahare’ iareo iraho,

vaho h’ondatiko iereo. 2

17Aa le miakara am’iereo,

vaho miavaha, hoe t’i Talè.

Ko mitsapa raha faly,

le hampihovaeko nahareo. 3

18Ho Rae’ areo iraho, vaho ho ana-dahiko

naho anak-ampelako nahareo,

hoe t’i Talè Tsitongerèñe. 4